Shillong, K’Lyngkot 12
Ka Mawlai kum ka kynhun kaba khlaiñ ka la jingjop da 8-0 kol ha ka jingïalehkai jong ka lympung Meghalaya State League 2024 pyrshah ïa ka Khliehmawlieh ha madan SSA ha ka Sngi Saitjaiñ ban buh jaka ïalade ha ka semifinal jong ka lympung ïalehkai phutbol kaba heh tam jong ka jylla.
Ha kawei pat ka jingïalehkai ha kane ka sngi ka long ba ka Ladthadlaboh ka la pynliem ïa ka Sutnga da 5-2 kol ha ka jingïalehkai Jaiñtia Hills Derby ha Diengshynrum, Khliehriat. Ka Shillong Lajong ka la long ka kynhun kaba nyngkong eh ban rung sha ka semi da kaba pynliem ïa ka Rangdajied United kaba bat ïa ka kyrdan semi da 3-1 kol ha ka jingïakhun ha ka quarterfinal kaba nyngkong ha ka taïew ba la dep.
Ka Sutnga bad ka Ladthadlaboh kim pat ju ïakynduh mynno-mynno ruh ha kane ka lympung bad ka Sutnga kaba don ha East Jaiñtia Hills ka la ïoh ban lam khmat ha ka minit kaba 13 lyngba u Raplangki Lyngdoh. Hynrei 10 minit na ka jingïakhun shwa ka kylla step ka Ladthadlaboh jong ka West Jaiñtia Hills ka la lah ban pynïakhaid lyngba u Rangdajied Sayoo (36′).
Ha ka kylla miet, ka Ladthadlaboh ka la lehkai bha ha kaba ka la ïoh ban thep kol lyngba u Dangaitlang Mulieh (51′), u Rangdajied (68′) sa shisien, u Banteilang Shylla (70′) bad u Dowell John Shylla (89′). Hapdeng kane ka jingïakhun u Solmon Sympli (77′) u la lah ban thep ïa ka kol ba ar na ka bynta ka Sutnga hynrei ka la kham dier khyndiat haduh katei ka por.
Ka Khliehmawlieh, ka ba wan ba-ar ha ka MSL 2023, kaba la pawnam bha ba ka la lah ban pynliem ïa ka Mawlai ha ka jingïakhun semifinal ha kane ka lympung ïalehkai ba lah dep, kaba la pynlong da ka Meghalaya Football Association ryngkat ka jingkyrshan jong ka Sorkar Meghalaya. Hynrei mynta u snem kam long shuh kumba lah dep, ha kaba ka Mawlai kam shym la leh bakla ei-ei ha ka jingïaid lynti kaba 90 minit.
Ka Mawlai ka la lamkhmat da 2-0 kol ha ka kylla step bad ïoh ban thep kol ha ka minit kaba 26, nangta bud sa ka kol ba la thep da u Khrawkupar Jana ha ka minit kaba 35. U Robert Khongriah (53′, 55′) u la thep kol ha ka kylla miet, bud sa u substitute u Romarius Laban (64′, 83′), u Khrawkupar (87′) sa shisien bad u Kevin Rymbai (90’+1) namar ba ka Mawlai ha kaba ka la lah lehkai bha ka bym shym la ailad ïa ka liang pyrshah wat tang shipor ruh.
Ka kol kaba nyngkong ka la wan hadien ba la ïoh da ka free-kick bad poi shapoh box bad uwei u rangïalehkai dien ka Khliehmawlieh u la thep ïa ka bol sha ka kol la jong katba u dang pyrshang ban khanglad ïa u Donlad Diengdoh ka Mawlai ba un ïoh rung sha ka kol. Ym pat dap 10 minit, lah ïoh banthep kol biang lyngba u Khrawkupar da ka rukom lehkai ba itynnad bha ha kaba u rangapkol ka liang pyrshah u Handbill Savio Syiemlieh um lah ban khang pyrshah ïa ka, kaba la wan najan dieng kol.
Lada ka Khliehmawlieh ka dei ban rung biang sha ka jingïalehkai kan donkam ban ïoh thep kol ha kaba sdang jong ka kylla miet hynrei, pynban ka Mawlai ka la nang pynjlan shuh shuh ïa ka jinglam khmat jong ka da kaba thep stet sa ar tylli ki kol da u Robert.
Nangta u nong-ïalehkai ba bujli u Romarius Laban u la rung ha ka jingïalehkai, da kaba thep ïa ka kol kaba ar jong u na ka angle kaba jrong bha. Nangta u Khrawkupar u la kylla long u rangïalehkai ba lai jong ka Mawlai ban thep ar kol bad u Kevin uba mih bujli hadien kata u la thep ïa ka kol kaba khatduh jong ka jingïakhun, bad bud sa ka kol ba la thep da u Robertson.
Na ka bynta kane ka jinglah ban lehkai bha jong u, u Robertson u la shah jied bad ïohpdiang ïa ka nam ‘Player of the Match’ bad u la ïoh ruh ïa ka trophi na u President ka Meghalaya Football Association u Bah Hamletson Dohling.
Ka quarterfinal kaba saw bad kaba khatduh kan long hapdeng ka Chipakkore pyrshah ïa ka Rymbai Shkenshynriah ha madan PA Sangma ha Tura ha ka 14 tarik Kyllalyngkot ha ka por 1baje nohphai sngi.
