Jowai, K’lyngkot 13
U Myntri ka tnad ïalehkai ka Jylla, Bah Shakliar Warjri, u la pyllait paidbah ïa ka jingrwai (theme song) kaba jer kyrteng ‘Ñiom Naphang’ ryngkat u Moscot ‘U Kiang” na ka bynta ka 6th Meghalaya Games 2025 ha ka Lah Sngi U Blei ha District Auditorium, Jowai.
Nalor u Myntri la donlang ruh u MLA ka Jowai bad Chairman ka MUDA u Bah Wailadmiki Shylla, u Deputy Commissioner ka West Jaiñtia Bah B.S Sohliya (IAS), Working President MSOA Bah John F. Kharshiïing, ka Vice President MSOA bad Chairperson Reception Committee State Level, Secretary ka Sorkar Jylla ka Kong Matsiewdor War Nongbri, u Assistant Director ka tnat ïalehkai Bah Khroobok Passah, u General Secretary MSOA Bah Finely L. Pariat nalor kiwei.
U Bah Shakliar Warjri ha ka jingkren u la ban jur ïa ka jingdonkam ban bei tyngka ha ki jingtei ïa ki kam ïalehkai bad ka jing-kyntiew ïa ki samla, da kaba pynpaw ba ki jingïa-lehkai ki wanrah ka jinglong ryntih bad jingïatylli hapdeng ki samla. U la ong ruh ba ka sorkar jylla ka la buh hakhmat eh ïa ka jingbei tyngka ha ki jingtei ïa ki jingïalehkai bad ka jingïarap pisa ïa ki synjuk ïalehkai.
U la kdew ruh ïa ka jingthmu jong ka sorkar ban pyndonkam bha ïa ki jaka ba la don lypa ha ki skul bad ki kolej, ha ka jaka ban shna ïa ki jaka thymmai. Kine ki jingbei tyngka kin ai jingmyntoi ïa ki jaka pule, ki Community Hall hadien ba la kut ki jingïalang.
Shuh shuh, u Myntri u la kdew ruh ba ka jingthmu jong ka sorkar ka long ban ai bor ïa ki samla ban pawnam ha ki jingïalehkai ym tang ha ka Jylla, hynrei ha ka rynsan jong ka ri baroh kawei. U la ai khublei ïa ka jingtreilang jong ki ophisar sorkar, ki synjuk ïalehkai bad ai khublei kitbok ruh ïa ki nongïalehkai kiba pyn-khreh ïa ki jingïalehkai ki ban sa wan.
Shwa kane u President ka MSOA, Bah John F. Kharshiing u la ong ba ka 6th Meghalaya Games kam dei tang ka jingïakop, hynrei ka dei ka lympung ban pyni ïa ka deiriti bad ka jinglong kyrpang jong ka Jylla bad u la khot ruh ïa ka jingïatreilang jong ki nongshong shnong ban ai ka jingkyrshan ïa ki nongïalehkai bad ban pynlong ïa kane ka lympung kum ka tamasa jong ka jingkmen bad jingïatylli.
U la ïathuh ruh ba ha kane ka lympung ïalehkai baheh jong ka Jylla kin don kumba 3,500 ngut ki nongïalehkai kynthup ïa 500 ngut ki official. Ki jait jingïalehkai ki don 25 tylli kynthup 4 tylli ki Demo Sports.
Hadien kane u Myntri ryngkat u MLA ki la leit jngoh ïa ki jaka ba la pynkhreh na ka bynta kane ka lympung kynthup ki jaka ïalehkai kumjuh ki jaka sah, ki jaka bam bad pynpaw ka jingsngewhun ban ïohi ïa ka jingïaid shakhmat ka jingpynkhreh bad aikhublei kyrpang ruh ïa u MLA bad ka bor synshar District kiba la pyrshang ban pynthikna ban long kiba la pynkhreh ha shwa baroh ki nongïaleh-kai kin poi ha kane ka jaka.
