Jowai, K’lyngkot 14
Ki kynhun ïalehkai phutbol na baroh ar ki kyrdan (shynrang bad kynthei) kiba mihkhmat ïa ki 11 tylli ki district jong ka Jylla kynthup ïa ka West Jaiñtia Hills District ki la wan poi ban pynkhreh na ka bynta ka lympung ïalehkai jong ka 6th Meghalaya Games 2025.
Ïa baroh ki kynhun ïalehkai la pdiang sngewbha da ki bor pynïaid district kumjuh ka shlem treikam u District Sports Officer, West Jaiñtia Hills ha madan Lad Mukhla ha ka step jong ka sngi Ba-ar.
La pdiang burom ïa uwei pa uwei u nongïalehkai phutbol da ki jingai sngewbha kynthup ka ryndia tlem, ka pla ïalehkai, bad ka shabi kaba don ïa ka dur Mascot.
U Bah Aiborlang Syiemlieh, Head Coach ka West Khasi Hills u la pynpaw ka jinghun halor ka jingpdiang sngewbha bad ka jinglong paralok ba la pynbiang da ka district ba pdiang ïa kane ka lympung.
Ka jingïalehkai phutbol kan sdang ha ka 15 tarik (sngi Balang), ha ka kyrdan Under-17 Boys, ka South West Garo Hills kan ïakhun pyrshah ïa ka East Garo Hills ha ka por 10 baje mynstep, ka South West Khasi Hills ïa ka East Khasi Hills ha ka por 12 baje mynsngi, ka East Jaiñtia Hills ïa ka Ribhoi ha ka por 2 baje nohphai sngi.
