Shillong, K’lyngkot 14
Ka Rangdajied United FC bad ka Shillong Lajong FC ki la ïoh jingjop ha ka lympung ïalehkai Shillong Premier League 2024 ha ka Sngi Ba-ar ha SSA Stadium kaba ha First Ground, Polo.
Ka Rangdajied ka la lah ban pynliem haduh 4-0 kol ïa ka Sawmer SC bad ka Lajong ka la jop da 1-0 kol ïa ka Laitkor SC.
Baroh kitei saw tylli ki kol jong ka Rangdajied ki la wan urlong ha ka kylla step lyngba u Ieitlang Syiemlieh (16 & 30) uba la thep ar kol, katba ïa ki shi kol la thep da u Wansiewdor Nengnong (19) bad u Arlangky Nongsiej (23) pyrshah ïa ka Sawmer, kaba la ïoh ban ïalehkai nyngkong ha ka SPL naduh ka 2 tarik u Nohprah bad kaba la hap ban pynshong ïa ki rangïalehkai ba kynsai na ka daw ka jingmynsaw.
Baroh ar tylli ki kol jong u Ieitlang ki la long kiba ksaw na ka bynta katei ka kynhun. Kaba nyngkong u la ïoh lyngba ka free-kick ha kaba u rangapkol u Pyrshangbanbha Dkhar um shym la lah ban kyrda na ka jingshah thep. Kaba phylla ka long ba ka kol ba ar jong u Ieitlang ka long kaba skhem bha ha kaba u la ïoh ban shut bad ka la rung hi jlang.
Ka kol jong u Wan-siewdor ka la wan hadien ba u la ïoh ban mareh shapoh ‘box’. U Pyrshang-banbha bad uwei rangïa-lehkai shadien ki la pyrshang ban khanglad hynrei u la lah ban thep hi jlang. Kawei pat ka kol ka la wan lyngba ka free-kick ha kaba u Fedrick Wahlang u la ïoh ban pyndei ïa ka bol da ka khlieh bad ka la poi sha u Arlangky, u bym shym la pynlehnohei ïa kane ka kabu ksiar.
Ar tylli ki kabu ksiar ki la wan mih paw ha ka kylla miet, ha kaba u Hamebantei Khongphai u la ïoh ban rah ïa ka bol na ka bynta ka Sawmer, hadien pat da u Arlangky uba la ïoh na ka bynta ka Rangdajied.
Ha kawei pat ka jingïakhun, u Deiborma-me Tongper u la thep tang marwei ïa ka kol na ka bynta ka Lajong pyrshah ïa ka Laitkor ha ka minit kaba 74, wat la u la hap ban shah bujli noh mardor namar ba u la mynsaw na ka kjat ha kane ka jingïakhun.
Ka Laitkor ka la ïoh ïa ka kabu kaba biang ha kaba u Ïaryngkatlang Khar -krang uba la ïoh ban shut bad la shah kyrda noh ha u rangapkol ka Lajong u Siwel Rymbai. Ha kawei pat ka liang, u Babysun -day Marngar ka SLFC u la ïoh ban thep kol, hynrei na ka liang u rephri u la rai ba ka dei ka ‘offside’.
Kane ka long ka jingïalehkai kaba khatduh jong ka Laitkor ha kane ka wat kaba nyngkong ha kaba la jop lai sien, ïakhaid shisien bad shah rem san sien ryngkat 10 poiñ. Wat la ka dang dei ka sien kaba nyngkong ban ïakhun ha ka SPL mynta ka aïom, hynrei kim shym la lah ban thep kol ha ki saw sien na ki phra sien ïakhun ba la dep.
Ka jingïalehkai ha ka Sngi Balang kan long hapdeng ka lahduh jong ka aïom ba la dep, ka Mawlai SC pyrshah ïa ka kynhun kaba don shatrai, ka Nongthymmai SC ha ka por 2:30 nohphai sngi.
