Tehran, K’lyngkot:
U President ka Iran- u Masoud Pezeshkian ha ka jingiakren bad ki nongthoh khubor, u la ong ba ka Iran kam shym la thmu satia ban pyniap ïa u President ba la jied jong ka Republican jong ka US, u Donald Trump, ha kaba u la kyntait ruh ïa ki jingkynnoh ba la pharep pyrshah ia ka Iran ha ki jingjia shah thombor jong u Trump mynba u dang pynlong jingialang paidbah naka bynta ka ilekshon President ha u snem ba la leit.
Ha u bnai Naiwieng, ka tnat aiñ jong ka US, ka la pynngat kyndon ia uwei u briew jong ka Iran, ha kaba iadei bad ka jingkynnoh ba la hukum da ki kynhun shipai ba pawnam jong ka Iran ban pyniap ia u President ba la jied jong ka US ha kitei ki por ba u dang leit ialap ilekshon. Hynrei ki bor pahara ki la ioh ban tehlakam noh ia katei ka jingthmu jong kitei ki runar kiba la kynshoit bad bthah da ki kynhun kieng atiar kiba thmu ban shim ia ka jingim jong utei u nongialam.
U Trump u la ong ruh ha u snem ba la dep ha ka por ba u leit ïalap ilekshon ha US ba ka Iran ka lah ban don sha lyndet jong ki jingpyrshang ban pynïap ïa u.
Hynrei u Pezeshkian haba iakren bad ki nongthoh khubor ha kane ka por u la ong “Ym don kano kano ruh kum kata ka jingthmu na ka liang jong ka Iran”.
U Trump, uba la jop ia ka ilekshon President jong ka US ha u Naiwieng jong une u snem ba la dep, un sa ioh ban shimti hi noh ia ka kam naduh une hi u bnai Kyllalyngkot jong u snem 2025 kum u President ba thymmai jong ka US bad u la lait im ruh na ki ar tylli ki jingpyrshang ban pyniap ia u, ha ki por ba u dang leit ban ai jingkren paidbah ha ki por katei ka ilekshon President ba la dep.
Ka Iran mynshwa ruh ka la kyntait ïa ka jingkynnoh jong ka US ba ka tuklar ïa ki kam iing- kam sem jong ka America, kynthup ia ki jingleit syntiat bad jingpynthud jong ka Iran lyngba ki kor ‘Online’ lane ki ‘Cyber’ kumba ju ia tip.
