Shillong, K’lyngkot 15
I Kong Kmoiñ Wahlang ba la don kumba 74 snem rta, na ka shnong Sngimawleiñ, South West Khasi Hillls, i la shah jied ha ka Sorkar Jylla na ka bynta ban ïohpdiang ïa ka khusnam ‘U Kiang Nangbah’ kaba dei na ka bynta ki nongïalehkai.
Ïa kane la pynbna da u Myntri Rangbah ka Jylla u Conrad K. Sangma hadien ba la wai ka jingïalang jong ka kynhun myntri ha ka Sngi Balang.
Kum ban shu pynkynmaw i Kong Kmoiñ i dei iwei na ki ‘riew tymmen ba la wanrah nam bad burom ïa ka Jylla halor ka jingleit shim bynta ha kiba bun tylli ki jingïakob mareh thong (marathon) kiba la long hapoh ka Jylla bad ha kylleng jong ka ri.
Ki jingïakob kiba i Kong Kmoiñ i la ïashim bynta bad ban ïoh ruh ïa ki nam jop ki long kum ka Mumbai International Marathon, World 10K Bengaluru, Myntra Marathon, 25K Kolkata Marathon, 1st Master Federation Cup bad ka Sohra International Half Marathon.
Kawei kaba pyndiaw ïa i ka long ba ha u snem ba la lah, i la duh leit shim bynta ha ka 13th Pan Pacific Masters Games 2024 kaba la long ha Australia ryngkat bad ka Kong Wandashisha Dewkhaid na ka daw ba ki la shah kyntait ïa ka visa.
