Las Vegas, K’lyngkot:
Katkum ki khubor, la ong ba ka jingjur palat jong ka lyer ka la nang pynsniew ïa ka jinglong-jingman ha Los Angeles ha kaba la mih ka jingpluh khlaw kaba jur katta-katta kaba la shim ia ka jingim jong ym duna ïa ka 25 ngut bad pynjot ïa ki spah tylli ki ïing paki jong ki heh spah Millionaire bad ki khlur jong ka Hollywood.
Ka National Weather Service, ka la maham lypa ia ka lyer ba khlaiñ jong ka ‘Santa Ana’, kaba beh kyrthep haduh 110 km ha ka shi kynta ha Los Angeles, kaba ap jingma ruh ia ka Los Angeles ba ka lah ban nang pynpur bad pynheh biang ia ki thylliej ding ha katei ka nongbah.
U nongpeit bniah u la bthah ïa ki nongshong shnong ba kin tip bha ïa ki sawdong sawkun jong ki bad ban long kiba la pynkhreh ban kynriah jaka lada wan pynthut kino-kino ki bor jong ka mariang. Ka la buh dak ruh ïa ki bynta bad ki dong bapher bapher ha Los Angeles bad Ventura ba ki lah ban ioh mad ia ka jinglong-jingman kaba shyrkhei bha ha ki sngi ban wan.
Ki stad wad bniah ki ong ruh ba ki jingthung jingtep ha katei ka jaka ki la tyrkhong bad kaba long ruh ka jingma kaba khraw ba katei ka lyer ruh ka dang lah ban pynsaphriang shuh-shuh bad pyn-pur stet ia katei ka ding. Namar la ong ba katei ka ding ka la dep bam duh haduh 24,000 akar ha ka Pacific Palisades bad ki la iehnoh kumba 14,000 akar ia ka shnong Altadena kaba la jot rathai.
U Anthony Marrone, uba dei u heh jong ka tnat pynlip ding ha Los Angeles, u ban jur ba ki long ba la khreh na ka bynta kino-kino ki jingma kiba mih thymmai.
