Ranchi, Kyllalyngkot:
U Myntri Rangbah ka Jharkhand u Hemant Soren u la kyntu ïa u Myntri ka sorkar kmie uba dei khmih ïa ka tnat Coal and Mines u G Kishan Reddy ban siew ïa ka bai dewïong jong ka jylla “kaba shongdor T.1.36 lak klur,” la ong ka jingthoh ba la pyllait da ki heh ba dei khmih.
La pynlong ïa ka jingialang hapdeng ki heh ophisar jong ka sorkar jylla, ka tnad dewïong bad ka Coal India Ltd ha ka jingïadonlang u Soren bad u Reddy ha ka taïew ba la lah. Ka sorkar Jharkhand ka la ai ïa ka jingbishar bniah halor ka jingsiew bai Mineral Royalty ba dang sah ha u Myntri ka sorkar kmie ha ka jingïalang, la ong ka jingthoh ba la pyllait.
“…U Myntri ka sorkar kmie jong ka tnat Coal u la bthah ba ki heh ka sorkar kmie kin ïatreilang bad ka sorkar jylla ban pynshisha ïa ka jingshisha jong kine ki jingkynnoh,” la ong ka khubor.U Soren u la ong ba ka sorkar kmie bad ka sorkar jylla ki donkam ban ïaid shakhmat lang ban pynïaid bha ïa ka jingtih dewïong, ka jingpynmih dewïong, ka jingshalan, ka jingshim jaka bad ka jingsiew bai lutksan.
U Myntri Rangbah u la ong ruh ba ïa ki jaka ba la dep tih mawshun dei ban pynphai biang sha ka sorkar Jharkhand.
“Ki don bun ki projek dewïong ha ka jylla, ha kaba la pyndep ïa ki kam tih dewïong bad ki jaka la iehnoh da ki kompeni dewïong. Ïa kita ym shym la pynkylla sha ka sorkar jylla bad ym shym la pyndonkam hok ïa ki. Namar kane, ka jingtih dewïong beaiñ ka la nang ïaid ha ki par dewïong ba la khang,” la ong u Soren.
U la ban jur ruh halor ka jingdonkam ban pynduna ïa ka jingpynjulor ïa ka mariang na ki kam tih dewïong.
U Soren u la ai jingmut ba ki kompeni dewïong ki dei ban shim khia ban plie ïa ki jaka ai jinghikai ba neh, ban pynshlur ïa ka kam jngohkai pyrthei bad ban pynkynriah ïa ka jaka treikam jong ka Coal India sha Jharkhand na West Bengal.
Ka BJP haUP ka wad ban khring ïa ki Dalit, thmu ïakhun pyrshah ïa ka Congress, SP da ka jingïalap paidbah ‘Samvidhan Gaurav’Ka BJP ka la sdang ïa ka jingïalap paidbah ‘Samvidhan Gaurav’ ha ka sngi Saitjaiñ ha Uttar Pradesh ban pynsngew ïa ka khubor sha ki Dalit ha ka jylla ba ka dei ka seng kaba ai burom kaba khraw tam ïa u Ambedkar bad ka Riti Synshar.
Ka kynhun jong ka BJP na Uttar Pradesh, ka la thmu ban sdang ïa ka ‘Samvidhan Gaurav Abhiyan’, ka jingïakhih kaba la shna kum ka jingkynthoh beit ïa ka Samajwadi Party bad ka Congress kaba buh ïalade kum ki nongsumar ïa ka Riti Synshar ha ka ilekshon Lok Sabha ba dang shen, naduh ka 11 tarik, Kyllalyngkot.
Kane ka jingïalap paidbah kan ïaid haduh ka 25 tarik, Kyllalyngkot, kan kynthup ïa ki jingïakren bad ki paidbah ha ki kyrdan bapher bapher bad ka jingïakren beit bad ki samla lyngba ki jingleit jngoh ïa ki skul bad ki kolej.
Ka jingthmu jong kane ka jingïalap paidbah ka dei ïa ki Dalit, bad ka khubor ba ka seng ka kwah ban pynsngew ka long ba ka BJP ka dei ka seng kaba ai burom kaba khraw tam ïa ki nongrim jong u B. R. Ambedkar bad ïa ki jingthmu jong ka Riti Synshar. Ka jingpyrta paidbah na ka bynta ka jingïalap paidbah ka long: ‘Humara Samvidhan Humara Swabhiman'(Ka Riti Synshar jong ngi, ka jingsarong ïa ngi).
Ki Dalit ki kheiñ palat ïa ka shi bynta na ka san bynta jong ki nongthep vote ha Uttar Pradesh. Ïa ka jingpynbna shabar la phiah ha ki ar bynta. Ha ka bynta ba nyngkong yn kdup ïa ki distrik ba kynthup ïa ka Lucknow, Prayagraj, Varanasi, Agra bad Ghaziabad, katba ïa ki distrik kiba dang sah yn kynthup ha ka bynta kaba ar.
Ban pynïadei bad ki samla, yn pynlong ïa ki jingïatai nia, ki jingkylli bad ki jingïakop thoh Essay. Ki nongïalap jong ka seng Yuva Morcha kin leit sha ki hostel ha ki jaka pule ban ïakynduh bad ki samla pule. Ka jingïalap kan hiar shaduh ki jaka thep vote, ha kaba ki nongbud jong ka seng ki dei ban lum ïa ki briew na ka bynta ban ïakren halor ka Riti Synshar, bad kumjuh ruh kumno ka BJP ka la pynneh ïa ka ki jingkordor.
Ka seng ka kyrmen ruh ban pynpoi sha ïing ïa ka khubor ba ka Congress bad ka Samajwadi Party ki shu pyndonkam ïa ka Riti Synshar na ka bynta ka jingmyntoi ha ka ilekshon. Ki nongbud jong ka seng kin pynksan ruh ïa ka jingngeit jong ki ba ka liang pyrshah ka la lehbeiñ ïa baroh ar kata ïa u Ambedkar bad ïa ka Riti Synshar ka ri. Ka BJP kan pynpaw ba kumno ka ‘jingthaw buit’ jong u Jawaharlal Nehru ka la pynlong ïa u Ambedkar ban rem ha ka ilekshon, bad kumjuh ruh ba kumno ka seng kam shym la ai ïa u ïa ka Bharat Ratna.
Ka Samajwadi Party kan shah thombor namar ba ka shim kabu ïa ki jingmyntoi jong ka Reservation bad kumjuh ruh ban pynkylla kyrteng ïa kawei ka Medical College ha Kannuaj. Ha u snem ba la lah, u Myntri Rangbah ka jylla, u Yogi Adityanath, u la wanrah ïa kane ka mat bad ong ba ïa kane ka kolej, yn pynkylla kyrteng noh da kaba nam ïa ka kyrteng jong u Ambedkar.
Nalor ka kynhun jong ki samla, ka kynhun SC/ST jong ka kynhun synrop, ka kynhun ki kynthei, ki MP, ki MLA bad ki bud ha ka kyrdan jong baroh ki seng ki la don bynta ha kane ka jingïalap.U Ram Chandra Kannaujia uba khlieh ïa ka kynhun ki SC/ST jong ka seng u la ong ba ka seng jong u kan ‘pynpaw pyrthei ‘ ïa ka liang pyrshah lyngba kane ka jingïalap paidbah.
