Doha, K’lyngkot:
U Myntri Rangbah-duh jong ka Qatar, u la pynbna ba ka Israel bad ka Hamas ki la mynjur ha ka Sngi Balang ban sangeh noh ia ka jing-iasiat bad ban pyllait noh ruh ia ki nongshah rahbor baroh kiba la shah rahbor bad kiba la shah bat slem ha ka kti jong ki lehnoh Hamas hapoh ka nongbah Gaza. U la bynrap ruh ba u kyrmen ba katei ka jingiateh kan long ka lad ka ban lah ban pynkut noh shisyndon ia ka thma hapdeng ka Israel bad ka Hamas.
Hadien ba ki nongpynïasuk kham mynshwa ki la ong ba la lah ban ïasoi ïa ka jingïateh, ka shlem treikam jong u Myntri Rangbahduh ka Israel,Benjamin Netanyahu, ka la maham ba katto katne ki mat ha ka phang pdeng, ki dang sah “bym pat lah ban pynbeit”.
U President Israel, Isaac Herzog, uba bat ïa ka bynta kaba kyrpang ha ka ri, u la ong ba kane ka jingïateh kular ka dei ka “jingleh kaba dei” ban wanlam biang ïa ki nongshah rahbor kiba la shah kem ha ka por ba thombor ka Hamas ha ka 7 tarik u Risaw 2023 kaba sdang khie ka thma.
U Sheikh Moham-med bin Abdulrahman bin Jassim al-Thani, Myntri Rangbahduh jong ka Qatar, haba ai jingkren ha ka jingialang bad ki nongthoh khubor ha ka Sngi Palei, u la ong ba kane ka jingsangeh iasiat kan sdang treikam naduh ka Sngi U Blei.
Kumta, la ong ba ha ka bynta ba nyngkong jong ka jingïateh soskular, ka Hamas kan pyllait 33 ngut ki briew jong ka Israel kiba ka la rahbor naduh katei ka por ba sdang khie ka thma, kynthup ïa ki kynthei, riew paidbah bad ki kynthei ba la shah pynrung kam bad kumjuh ïa ki khynnah bad ki tymmen, kum ka jingiapyllait briew mar kylliang ban ia kylliang bad katto-katne ngut ki koidi kiba dang shah set ha ki patok jong ka Israel.
Shuh shuh ruh la ong ba nongïakhih ha Tel Aviv pat, kiba dang iai dawa ia u Myntri Rangbahduh ka Israel ban pyllait noh ïa ki nongshah rahbor baroh, ki la pdiang sngewbha ia katei ka khubor jong ka jingïateh soskular, katba da ki hajar ngut ki paid nongshong shnong ka Gaza pat, ki la sngew heh mynsiem ban iohsngew ïa kane ka jingïateh soskular ka ban long ruh ka lad ban pynkut noh shi syndon ia ka thma hapdeng ka Israel bad ka Hamas kaba la ïaid mynta la 1 snem tam.
Ka Hamas ka la ong ba ka jingsangeh thma ha kane ka por, ka long u soh ka jingjop banar ja jinglong shlur ba pawnam jong ki paidbah Palestine bad ka jingpyrshah ba shlur jongki la kumba 15 bnai ban dawa ia ka Israel ban sangeh noh ia ka jingleit thombor sha katei ka nongbah.
Ha ka Sngi Balang, u Sheikh Mohammed u la ong ba ki 3 tylli ki ri kin buddien ïa ka jingpyntreikam ïa ka jingsangeh thma lyngba ka kynhun kaba don ha Cairo.
U president jong ka US, u Joe Biden, u la ong ba u sngewkmen shi katdei eh halor ka jinglong- jingman bad ka jing seisoh jong ka jingpynbeit ia ki kam- ki jam ha kane ka kynti, da kaba bynrap ruh ba katei ka jingïateh kan long ruh ka lad ban lah ban pynsangeh noh shi syndon ïa ka jingiakynad hapoh ka nongbah Gaza.
