Shillong, K’lyngkot 17
Ka Rangdajied United FC (RUFC) ka la bteng ïa ka jingïaid lynti ha ka jingïalehkai bha jong ka lympung OC Blue Shillong Premier League 2024 da kaba jop ïa ka Langsning FC da 3-0 kol ha madan ïalehkai SSA ha madan First Ground, Polo ha ka Sngi Thohdieng.
U Owanijuh Pajuh (19′, 56′) bad u Aenam Jyrwa (62′) ki la long ki nongthep kol ha kaba ka Rangdajied ka dang ïaineh khlem shah rem na ki hynñiew tylli ki jingïalehkai mynta; ka la lah ruh ban bteng ïa ki jingïalehkai khlem da shah thep kol ha ki liang pyrshah. Ka RUFC ka la pynkut ïa ki jingïalehkai ha ka wat ba nyngkong da kaba jop hynriew sien, ïakhaid shisien bad rem arsien ryngkat 19 poiñ.
Kane ka long kaba ïapher bak-ly-bak na ka bynta ba nyngkong jong ka samoi ïalehkai ha kaba ki la shah rem ar tylli ki jingïalehkai ba nyngkong ha ki klob kiba don hajrong jong ka miej kheiñ poiñ – ka Mawlai SC kaba don ha ka kyrdan ba ha kliar bad ka Shillong Lajong FC ha ka kyrdan ba ar. Ka Langsning, ha kawei ka liang, ka dang shu lait shabar na u laiñ jong ka jingshah pynhiar kyrdan ryngkat 7 poiñ. Ha ka wat nyngkong la sakhi ba ki la jop tang arsien, ïakhaid shisien bad rem hynriew sien. Ki don ka jingïapher kol kaba kham sniew haba ïanujor bad ka Nongthymmai SC kaba don ha ka kyrdan khyndai (-10 to -6), kaba don ruh 7 poiñ, hynrei, kaba kongsan ka long ba ka Langsning ka don ïa ka kabu kaba kham ha kliar.
Ka kol kaba nyngkong jong u Owanijuh la sakhi ba u shut da kadiang ban rung sha kol ha ka kylla step bad ka kol ba ar jong u ka la wan hadien ba u la thep na ka liang kadiang na shapoh kaba la ïaid lyngba u nongap kol jong ka Langsning u Rajat Paul Lyngdoh.
Khyndiat minit hadien kata, u Aenam u la mareh na u laiñ ba shiteng bad u la thep ïa ka bol na shabar ka synduk.
Ha kawei pat ka liang, u Manbhalang Nongmin uba la jan ïoh thep kol ha kaba pynlong ïa u nongapkol ka Rangdajied u Kerichard L Marshillong ban kynthih bad pyllait na ka kol ha kaba kut jong ka kylla step. Ka Langsning ruh ka la don katto katne tylli ki lad ban khyllie pat ïa ka jingïalehkai ha ka kylla miet hynrei khlem lah urlong, ha kaba ïa ka free kick jong u Dajiedlang Wanshnong la lah ban sangeh bad khanglad biang da u Kerichard.
U Rajat Paul hadien kane u la lah ban ïada na ka ba shah thep kol na u Owanijuh kaba hajan bad u Ronney Chel Khongrangjem, nangta u la pynphai biang ïa ka bol kaba wan phai arsien sha jngai shwa ba kan lah ban jam ïa u laiñ kol bad pynlong ïa u ruh ban duh noh ïa ka hat-trick.
Ka jingïalehkai babud jong kane ka lympung kan long ha ka Lah Sngi U Blei hapdeng ka Lajong pyrshah ïa ka Nongthymmai ha ka por 2:30 noh phai sngi.
