Jowai, K’lyngkot 17
U Commissioner & Secretary ka Sports and Youth Affairs ka Sorkar Jylla, Dr. Vijay Kumar ha ka 16 tarik Kyllalyngkot u la hiar sha West Jaiñtia Hills ban leit jngoh ïa ki jaka sah, jaka bam bad jaka ïalehkai ba la pynkhreh na ka bynta ka 6th Meghalaya Games ha Jowai bad Wahïajer.
Haba ïakren bad ki lad pathai khubor hadien ka jingleit jngoh, u Dr. Vijay Kumar u la ïaroh halor ka rukom pynkhreh-pynkhrum kaba dang ïaid artad shaid-shaid.
Da ka jingwan ka Meghalaya Games, ka Jowai ka la kup ïa ka dur kaba thymmai namar la pynbha pynmiat ïa ki jaka ïalehkai, ki ïing Community Hall nalor kiwei-kiwei.
Ha kaba ïadei bad ka jingtei ïa ka Pung Jngi ha Jowai, u Dr. Kumar u la ong ba kan dang shim por ban pyndep ïa ka jingtei, nalor kata ha kaba ïadei bad ki jingtei jingshna kiba dawa bha kum ka jingpynbiang bording ha Wahïajer, ki jaka peitkai ha Kiang Nangbah Stadium, u la pyntip ba ka jingpyntrei kan bteng hadien ka lympung.
La synran ïa u Dr Kumar da ki nongïalam ka MSOA ryngkat ki ophisar sorkar.
Shwa kane, kum shibynta ka 6th Meghalaya Games, ka kynhun Megha Warriors ka la wan ban pynshong shit ïa ki paidbah da ki jingshad Flash mob ha ki lai tylli ki jaka ha Wahïajer, kynthup ruh ha ïew Iawpynsin.
Kane ka lympung bah ka jylla kaba dang ïaid mynta ryngkat bad ki jingïalehkai kynjat bol, bad ka jingplie paidbah la buh ban long ha ka 21 tarik u Kyllalyngkot ha Wahïajer.
