Jowai, K’lyngkot 17
Ka Lamin XI bad Padu Mawsku ki la buh jaka ïalade sha ka semi final jong ka lympung ïalehkai Upper bad Lower Division Football Tournament ba la pynïaid da ka Amlarem Sub-Divisional Sports Association (ASSA).
Kane ka la long hadien ba ki la ïoh jingjop ha ka jingïalehkai quarter final kaba la long ha madan Mini Stadium Ladjaplem, Amlarem ha ka 17 tarik Kyllalyngkot.
Haba phai sha ka jingïalehkai jong ka kyrdan Lower Division, ka Padu Mawsku ka la jop ïa ka Everlasting Sohkha Shnong da 1-0 kol. Ïa kane kol la thep da u Lekirang Pohshna (47).
Katba ha ka kyrdan Upper Division, ka Lamin XI ka la pynrem ïa ka Seng Samla Shnongpdeng da 2-1 kol. Ïa ki kol jong ka Lamin XI la thep da u Freedy Gayang (33 & 50) katba na ka Seng Samla Shnongpdeng la thep da u Mewan Lamin (49).
Mynta ka sngi ka jingïalehkai quarter final kaba khatduh ha ka Lower Division kan long hapdeng ka Mupyut Dongwah pyrshah ïa ka Hynriam Thangbuli ha ka por 12.00 baje mynsngi. Katba ha ka Upper Division kan long hapdeng ka SCC Padu pyrshah ïa ka Namrhen Ryntih Kudengrim ha ka por 2.00 baje nohphai sngi.
