Ha ka sien balai khur jingjop ka Meghalaya ha ka Senior Women’s T20, 12 run jop ïa ka Nagaland

Shillong, Naiwieng 01

Ka kynhun ki ‘thei ïalehkai kriket ka Jylla ka la lah ban pynliem ïa ka Nagaland da 12 run ha ka jingïakhun kaba saw jong ka Senior Women’s T20 Trophy 2026-27 (plate group) ha ka sngi Saitjaiñ ha Sovima, Nagaland.

Ha kane ka jingïakhun ka Nagaland kaba la jop ïa ka kynting pisa, ka la jied ban kawang bol nyngkong. Te kumta ka Meghalaya ka la buh ïa ka thong da kaba kamai 90/7 ha ki 20 over.

Watla ka Meghalaya ka la buh ïa ka thong kaba duna eh, hynrei ka la lah pat ban khanglad ïa ki nongtied ka liang pyrshah ha kaba ka Nagaland ka la kamai tang 78/5.

Kane ka long ka jingjop kaba lai na ka bynta ka Meghalaya na ki lai sien ïakhun bad ïa ka nam Player of the Match la ïohpdiang da ka kapten ka Debasmita Dutta.

Ha katei ka pali tied, ka Luiza Tamang (12), ryngkat ka Debasmita ka la tied 33 na ki 48 bol (3x4s). Kumjuh ka Monica Lyngdoh Phawa ka la lah ban ïalehkai bha hakaba ka la long ka nongtied kaba khlem shah pynkhyllem ha kaba ka la kamai 24 run na ki 28 bol (2x4s).

Haba wan beh ïa ka thong, ki nongtied ka Nagaland ki la shah pynhap wiket iwei hadien iwei, kata ka Najmeen Khatun (5) bad ka Talirenla Pongen (7), hynrei hadien ka Sentilemla Imsong (26 not out) ka la lah ban ïalehkai bha, hynrei katei ka kynhun kam shym la lah ban kynjoh sha ka thong bad ka la mad ïa ka jingshah rem.

Ki saw ngut ki ‘thei ïalehkai ka Meghalaya kiba la lah ban pynhap wiket ki long ka Neha Hajong (2/11), Ajima Sangma (1/8), Debasmita (1/20) and Inda Kharwanniang (1/21).

Ka Meghalaya kan ïakynduh sa ïa ka Mizoram mynta ka lah sngi U Blei.