Shillong, Naiwieng 01
San ngut ki dkhot ka Indian Olympic Association (IOA) kin wan sha ka nongbah Shillong ha ka lah sngi U Blei ban pynbiang ïa ki jingïalehkai na ka bynta ka lympung ïalehkai 39th National Games, ka ban long ha u snem ban wan ha kane ka Jylla.
Ïa kane ka la ïathuh da u Myntri ka tnat ïalehkai u Bah Wailadmiki Shylla ha ka taïew ba la lah ha kaba u la ong ba ka Games Technical Conduct Committee (GTCC) jong ka IOA kan pynlong ka jingïamir jingmut lang bad ka Meghalaya National Games Secretariat na ka bynta ban ïapynbeit ïa ki jingïalehkai ki ban shah kynthup ha katei ka lympung ïalehkai kaba heh jong ka ri.
U la ong ka Jylla ka la ap khmih lynti ïa kane ka jingwan jong ki sha kane ka nongbah hadien ba la dep thaw dangshen ïa katei ka komiti. Ïa katei ka komiti la khlieh da ka Sunaina Kumari kum ka chaiman, ryngkat u Ravinder Choudhary, Maninder Pal Singh, V. Sunil Kumar bad Dushyant Sharma, SSP-JKP, kum ki dkhot.
