Shillong, Naiwieng 01
Ka skul Loreto Convent ka la long ka lahduh ha ka 1st Inter-School Artistic Gymnastics Championship 2026, kaba la poi sha kaba kut ha ka sngi Saitjaiñ ha Gymnasium-cum-Indoor Hall, kaba ha J.N. Sports Complex, Polo.
Kane ka skul ka la khur 12 tylli ki takma, kynthup ïa 6 ki takma ksiar, 4 ki takma rupa lem bad 2 ki rnong. Ïa ka kyrdan ba-ar la ïoh da ka Government Girls H.S.S lem bad ka Shillong College, kiba la khur mar 3 tylli ki takma ksair. Katba ï aka kyrdan balai la ïoh da ka Pine Mount School kaba la khur 10 tylli ki takma (1 ksiar, 2 rupa bad 7 ki rnong).
Ïa ka nam Promising Athletes la ïoh da u Omebankhraw Ryntathiang n aka St. Joseph H.S.S bad ka Bimiksa Pangmae D Sangma n aka St. Margaret’s H.S.S.
Ïa katei ka lympung ïalehkai kaba ar sngi la pynlong da ka Meghalaya Gymnastics Association (MGA) ha ryngkat ka jingkyrshan lang da ka tnat ïalehkai ka Sorkar Jylla, ha kaba la wan shim bynta da 130 ngut ki khynnah kynthei bad hynrang na ki 30 tylli ki skul kiba na East Khasi Hills.
Na ka liang u Director ka tnat ïalehkai u Bah Alertson Nongbri (MCS) u la pynpaw ka jingai khublei ïa ki dkhot ka Meghalaya Gymnastics Association kiba la lah ban pynlong ïa kane ka lympung ha ka sien kaba nyngkong kaba long shi bynta ban plie lad ïa ki khynnah ba kin pyni ïa la ki sap ïalehkai. U la ong ruh ba na ka daw ka jingduna jaka ban ïalehkai, la ailad ban kin pyndonkam lang ïa katei ka hall ïa ki nongïalehkai badminton bad gymnastics.
U Bah Nongbri u la ong ba haba phai sha ka National Games 2027 ka ban sa long ha Meghalaya, ki nongïalehkai kin donkam ban ïalehkai bha ha katei ka lympung. U la ong ruh ba na ka liang ka Sorkar ka la lah ïa kaba bha tam ban wanrah ïa ki coach kiba nabar, ka rukom bam lem bad ki riew shemphang khang ba ki nongïalehkai kin lah ban ïalehkai bha ha ryngkat ka jingsngewskhem.
Katba u Senior Project Engineer ka State Sports Council u Bah Phrangki Pale kum u symbud kongsan, u la ong ka Meghalaya kam duna sap ïa ki sap ïalehkai gymnastics hadien ba u la sakhi ïa ki sap jong ki khynnah. U la ong ba mynta sa kumba saw bnai ban pynlong ïa ka 39th National Games, ha kaba u la kyntu ïa ka MGA bad ïa ki nongïalehkai ba kin trei shitom ban khur ïa ki takma na ka bynta ka Jylla.
Haba kaba ïadei bad ka jingïalehkai Gymnastics yn pynlong ha Tripura, u Bah Pale u la ong ba ki nongïalehkai ka Meghalaya kim dei ban rit mynsiem. Da kaba kdew ïa ka Dipa Karmakar jong ka Tripura kaba la khur takma ha ka Commonwealth bad kiwei pat ki lympung ïalehkai bar ri, u la ong ba ki nongïalehkai na ka thaiñ shatei lammihngi ruh ki lah ban long ki nongjop.
Ïa ki khusnam sha ki nongjop la sam da u Bah Nongbri, ryngkat u Bah Pale, kumjuh u Working President ka MGA u Jibonsing R. Marak, Publicity Secretary Bah Francis A. Khongwar, ka General Secretary Kong Lucy Mary Malngiang, u Joint Secretary ka MSOA Bah P. Laloo, u Treasurer ka Meghalaya Badminton Association Bah A. Lakiang bad kiwei.
