Shillong, K’Lyngkot 19
Ka Mawjam CC ka la pyn -liem noh ïa ka Dynamite CC da 6 wiket na ka bynta ban ïoh jingjop ha ka lympung ïalehkai Third Division Shillong Cricket League 2024-25 ha ka Sngi U Blei.
Ha kane ka jingïakhun kaba la long ha madan Urkaliar, Shillong, ka Dynamite ka la kam trai shwa ban tied nyngkong ha kaba ka la ïoh 140 run bad shah pynhap 9 wiket ha ki 20 over. U Chintu Shah u la khyrwit ïa ka shiteng spah kaba 55 run na ki 50 bol. Katba u Samarjeet Kr Rai u la shim 3 wiket bad 2 wiket da u Sumit Kr Shah na ka bynta ka Mawjam.
Haba wan shimti ïa ka pali kaba ar, ka Mawjam ka la lah ban kynjoh sha ka thong da kaba ïoh 142 run bad shah pynhap 4 wiket ha ki 16.3 over. Kane ka la wan urlong lyngba ka jingïalehkai bha u Raja Gurung uba la ïoh ban khyrwit ïa ka shiteng spah kaba 59 run na ki 30 bol bad u Aman Marba-niang u la ïoh 46 run na ki 42 bol. Katba u Brewill A Sangma u la shim shi wiket na ka bynta ka Dynamite. Ïa ka nam Player of the Match la ïohpdiang da u Raja Gurung.
Haba phai sha kawei pat ka jingïakhun kaba ar, ka Shillong Sixers ka la jop da 42 run ïa ka Inningstar. Ka Shillong Sixers kaba la shimti ban tied nyngkong, ka la ïoh 159 run bad shah pynhap 9 wiket ha ki 20 over. U Sandeep Roy u la khyrwit ïa ka shiteng spah kaba 65 run na ki 42 bol. Katba u Jitender Rai u la shim 4 wiket bad 2 wiket da u Marshal Marbaniang na ka bynta ka Inningstar.
Haba wan beh ïa ka thong ba la buh da ka liang pyrshah, ka Inningstar ka la ïoh tang 117 run bad shah pynhap 10 wiket ha ki 15.5 over. U Jitender Rai u la tied 23 run na ki 18 bol bad u Sumit Narzary u la ïoh 19 run na ki 16 bol. Katba u Sandeep Roy (Player of the Match) u la shim 4 wiket na ka bynta ka Shillong Sixers.
