Shillong, K’Lyngkot 19
Ka Meghalaya Football Association ka la pynbna ïa ki tarik ban ïakhun ïa ka semi final jong ka lympung ïalehkai Meghalaya State League 2024.
Ka jingïakhun kaba nyngkong kan long hapdeng ka Ladthadlaboh SC pyrshah ïa ka Mawlai SC ha SSA Stadium, Polo ha ka 27 tarik mynta u bnai. Hadien kane yn pynbud sa ka jingïakhun kaba ar hapdeng u Rymbai Shkenshynriah pyrshah ïa ka Shillong Lajong FC ha ka 28 tarik ha madan ïalehkai Wahïajer Multipurpose Sports Complex.
Ïa ka jingïakhun semifinal kaba nyng-kong yn pynlong lyngba ki jingshai jong ki flood light, ka ban sdang naduh ka por 4:30 janmiet, katba kaba ar kan sdang ha ka por 1:30 nohphai sngi. Ïa ki tiket lah ban ïoh na baroh ar tylli ki jaka ïalehkai ha kaba ki ‘riew ieit phutbol ki lah ban ïoh ha ka dor T.50 bad T.100 tyngka.
Kum ban shu kdew biang, ka Lajong ka la pynliem ïa ka Rangdajied United ha ka qurter final ba nyngkong da 3-1 kol, kumjuh ka Ladthadlaboh ka la pynliem ïa ka Sutnga da 5-2 kol bad ka Mawlai ka la pynliem ïa ka Khliehmawlieh da 8-0 kol. Nangta ka R. Shkenshynriah na East Jaiñtia Hills ka la leit sha Tura ha kaba ka la lah ban pynliem ïa ka Chipakkore da 2-0 kol.
Ha kane ka lympung ki la don haduh 24 tylli ki kynhun na kylleng ki district jong ka Jylla kiba la wan shim bynta bad mynta sah sa tang saw tylli kiba la rung sha ka semi final; ar tylli na Shillong (Lajong bad Mawlai), kawei na West Jaiñtia Hills (Ladthadlaboh) bad kawei pat na East Jaiñtia Hills (R Shkenshynriah).
Ka MSL kaba la pynlong da ka Meghalaya Football Association bad la kyrshan lang da ka Sorkar Jylla, ka la long ka jingthrang na ka bynta baroh ki ‘riew ieit phutbol ba kin ïoh ban sakhi ïa ki jingïakhun semi final.
Kumba ka paw kham ha shwa dei tang ka Lajong bad ka Mawlai kiba la rung sha ka semi final ha ka MSL, ha kaba ka SLFC ka la khmih lynti ban rah biang ïa ka nam lahduh naduh ba ka la rah teng ha u 2019. Ka Niaw Wasa United ka la rah nyngkong ha u snem 2018 bad khatduh eh la rah da ka Rangdajied ha u snem 2023.
