Nongpoh, K’Lyngkot 19
Ka All Meghalaya Kick-Boxing Associa-tion (AMKA) ha ka Sngi Saitjaiñ ka la pynkut noh ïa ka prokram ai jinghikai ba hynriew sngi lynter ha Umsning ïa kaba la tip kum ka 8th State Level Training Camp, 2025.
Ha kane ka sngi la ïadon lang da u MLA ka Umsning konstitwensi, Dr Celestine Lyngdoh kum u kongsan, kumjuh u President ka AMKA, Bah Samuel Hashah ba dei ruh u nongai jinghikai ïa ki khun samla bad ki hep barit nalor kiwei kiwei de.
Haba ai jingkren ha kane ka sngi, u Dr. Celestine u la pynpaw ïa ka jing-kmen ban ïadon lang ha kane ka sngi ban sakhi ïa ki khun samla bad ki hep barit kiba la wan ban ïashim bynta ha kane ka jingai jinghikai kaba la pynlong ha Umsning.
U la ong ruh ba kane ka jingïalehkai Kick-Boxing ne kino-kino ki kam ïalehkai, ki donkam ïa ka jingminot tista da ki snem ban long kiba janai bad kumba kane ka juk mynta ka ai ïa ka lad kamai bapher bapher, kaba donkam eh ka long ban don ïa ka jingtbit bad jingjanai kaba kham pher ban poi shaduh uta u pud ha kaba u la kyntu ïa ki khun samla bad ki hep kiba rit ba kin shim khia ban leh tista ban pyntbit shuh shuh ha kane ka phang nalor ka jingpule ka jong ki.
Shuh shuh, Dr. Lyngdoh u la ai ruh ka jingïaroh ïa u President ka AMKA, Bah Samuel Hashah uba la shim khia hi dalade ban ai jinghikai ïa ki khun samla bad ki hep barit bad kitbok kitrwiang ruh ïa ka AMKA bad ki khun samla bad ki hep barit ba une u snem 2025 un long u snem uba plie lad plie lynti bad u snem jingkyrkhu ïa ki ba kin nang lah ban kiew shaphrang ha ka jingim ka jong ki.
