Jowai, K’lyngkot 20
Ïa ka lympung ïalehkai 6th Meghalaya Games 2025 yn plie pyrda ha ka Sngi Ba-ar ha Wahïajer Multipurpose Stadium ka ban ïashim bynta da 3500 ngut ki nongïalehkai kynthei bad shynrang kiba la wan na kylleng ki district jong ka Jylla.
Ïa kane ka lympung yn wan plie da u Myntri Rangbah ka Jylla, Conrad K Sangma ha ka jingïadon lang u Myntri ka tnat ïalehkai, Bah ShakliarWarjri, kumjuh ki nongïalam ka Meghalaya State Olympic Association (MSOA) bad kiwei kiwei.
Ha kane ka lympung kin don haduh 29 tylli ki jingïalehkai bapher-bapher, kynthup ïa ka Golf bad ka Swimming ki ban pynlong ha Laitkor bad ha pung Crinoline, Shillong. Kane ka long sien kaba nyngkong eh ba la kynthup lang ïa hynñiew ngut ki nongïalehkai kiba duna dkhot met (saw ki kynthei bad lai ki shynrang) ki ban shim bynta ha ka jingïakob siat suloi pistol bad rifle.
Kumta, shi sngi shwa ban sdang kane ka lympung, ka sharak jong ka 6th Meghalaya Games 2025 ka la wan poi ha nongbah Jowai ha ka Lah Sngi U Blei da ka jingïaid lynti kaba 360 KM kaba sdang na Turam Shillong bad aiti ïa ka sha ka West Jaiñtia Hills, kaba long ka nongpdiang ïa kane ka lympung bah ka Jylla bad la buh ïa ka ha Iungwalieh ka Lumkyrwiang.
Ka jingleit shwa ïa ka sharak ka sdang da ka jingïaid paidbah na Hyperfuse Cafe, Chahtngit bad la ïaid lyngba ka Ïawmusiang, Mission Compound haduh Lumkyrwiang ha kaba la synran lang da ka samla Heimonki Khaii, ka nongmareh bad u Jason Kerchwami Passah.
Te kumta ha ka Sngi Ba-ar ha ka por 2 baje nohphai sngi, ïa ka sharak yn rah sha ka jaka plie paidbah ïa kane ka lympung ha Wahïajer ban pyni ïa ka jingsdang jong ka Meghalaya Games kaba la ap khmih lynti bha.
Ha kane ka sngi la donlang u MLA ka Jowai bad Chairman ka MUDA u Bah Wailadmiki Shylla, u Working President Bah John F Kharshiiing, Vice President ka MSOA bad u Chairperson jong ka Reception Committee jong ka State Level Secretary jong ka sorkar Jylla ka Kong Matsiewdor War Nongbri, General Secretary ka MSOA Bah F. Pariat, u Waheh shnong Lumkyrwiang u Bah Lammat-OO Laloo bad kiwei.
