Mumbai, Kyllalyngkot:
Shisngi hadien ba la pynbna ïa ki Myntri ba dei khmih ïa ki distrik, ka sorkar Maharashtra ka la pynsangeh noh ïa ka rai na ka bynta ki distrik Raigad bad Nashik halor ka jingïakajia hapoh ka kynhun synrop Mahayuti kaba bat ïa ka jingsynshar.
Ka Myntri jong ka Women and Child Welfare ka Aditi Tatkare na ka Nationalist Congress Party (NCP) ka la shah thung kum ka Guardian Minister ka Raigad katba u Myntri ka Water Resources na ka BJP u Girish Mahajan la aiti ban dei khmih ha ka kam ha Nashik, hynrei la weng noh ïa ka jingthung jong ki hadien ba la mih ki jingïakynad hapoh katei ka kynhun synrop.
La ïathuh ba ka Shiv Sena hapoh ka jingialam jong u Symbud Myntri u Eknath Shinde, ka la sngewsih halor ka jingshah kyntait ïa ka jinglong Myntri nongpeit nongkhmih jong kitei ki ar tylli ki distrik. U Myntri ka Employment Guarantee Scheme of Maharashtra and Horticulture u Bharat Gogawale bad u Myntri ka pule puthi u Dadaji Bhuse ki dei na Raigad bad Nashik. Baroh arngut ki la bat ïa ka jingkyrmen ban shah jied kum ki Myntri ba peit ïa kine ki ar tylli ki distrik.
Baroh arngut u Gogawale bad u Bhuse kim shym la shah thung kum ki Guardian Minister Myntri jong kino kino ki distrik katba ïa ki Myntri sorkar na ka BJP kum ka Madhuri Misal, ka Meghana Sakore-Bordikar, u Pankaj Bhoyar bad u Ashish Jaiswal jong ka Shiv Sena la ai ïa ka jingkitkhlieh kum ki Guardian Minister jong ki distrik bapher bapher. Arngut kiwei pat ki MoS ha u Yogesh Kadam jong ka Sena bad u Indraneel Naik jong ka NCP ruh ki la shah kyntait.
Ka jingïakajia halor kine ki ar tylli ki distrik ka la pynlong ïa ka sorkar jylla ban pynmih ïa ka hukum ban pynsangeh noh ïa ka jingthung ïa ki Myntri nongpeit nongkhmih ha Raigad bad Nasik tad haduh ban da pynbna da kumwei pat. Ka NCP bad ka Shiv Sena ki ïakhun ban ïoh ïa ka bor synshar hapdeng ka BJP kaba nang pynjur ïa ka jingsynshar jong ka ïa ka North Maharashtra. Khnang ban lait na ka jingïakynad, la shim ïa ka rai ban pynsangeh noh ïa ki jingthung kam na ka bynta shipor.
