Beijing, China:
Ka China ha ka Sngi Nyngkong ka la shim noh ia ka jingim jong uwei briew uba la pyniap ia 35 ngut ki briew ha ka jingjia iatyngkhuh kali kaba shyrkhei tam ha ka nongbah Zhuhai kaba don sha ka phang Shathie jong katei ka ri ha u bnai Naiwieng ha katei ka jingiap briew kaba shyrkhei tam ha katei ka ri.
Ha ka 11 tarik u Naiwieng, u Fan Weiqiu, 62 snem ka rta, u la ñiah ia ka kali SUV bad u la leit tur pyrshah ia ki nonglehkai kiba dang kilan met habar jong ka jaka ialehkai, ha kaba 45 ngut ki la mynsaw jur ha katei ka jingjia. Kane ka dei ruh ka jingjia kaba shyrkhei tam ba ka China kam ju sakhi shuh naduh u 2014.
Ha ka sngi Nyngkong la iathuh ba ka ïingbishar jong ka Zhuhai ka la ai bor ban shim noh syndon ia ka jingim jong u Fan Weiqiu katkum ka kyndon pynshitom ba la pynngat ia u bad ba la pynmih da ka ïingbishar ba ha khlieh duh jong ki paidbah.
Kumta, la ong ba ka jingshah rai pyniap jong u Fan ka pynkyndit ia ki paidbah bad ka la ktah ruh ia ka jingiatip lang jong ki paidbah nong China haba iadei bad ka jinglong- jingman jong ka imlang- sahlang.
Hynrei, ki pulit ki la iathuh ba ki la lap ia u hapdeng ka jingmynsaw jur, kaba la pharep ba u Fan u la pynmynsaw hi da lade – ialade bad haduh ba un da ioh kem pang ‘Coma’.
Ha ka jingbishar ia u, kaba la long ha u bnai ba la leit, u Fan u la shah pynrem jur bad shah ñiew be-aiñ ha khmat ki katto katne ki bahaïing jong kitei kiba iap, ki heh sorkar bad ha khmat ki paidbah.
Ka ïingbishar ka la lap ruh ba u Fan u leh ia katei ka kam thombor, namar ka jingbitar jong u halor ka jingiakhlad lok na ka kurim jong u bad kumta u la leh kput ia ki briew shabar pat ban pyllait ia ka jingdom jong u baroh. La ong ruh ba u Fan u la leh ia kane hadien ba u la iaphet na ka kurim jong u bad ka daw ba kongsan ruh ka long namar ba um hun ia ka jingiaphiah ia ki jingdon- jingem hadien katei ka jingiakhlad jong u na katei ka kurim.
