Shillong, K’lyngkot 21
Ka Laimer CC bad ka Shibakha ki la ïoh jingjop ha ka lympung ïalehkai Third Division Shillong Cricket League ba la pynïaid da ka Shillong Cricket Association ha ka Sngi Ba-ar ha madan Urkaliar, Shillong.
Ha kane ka jingïakhun ka Laimer ka la pynliem noh ïa ka New Warriors Jr da 51 run. Ka Laimer ka la kam trai ban tied nyngkong ha kaba ka la ïoh 190 run bad shah pynhap 3 wiket ha ki 20 over. U Settlelight Diengdoh u la khyrwit ïa ka shiteng spah kaba 72 run na ki 30 bol bad u Boxer Marbaniang u la khyrwit 62 run na ki 39 bol. Katba u Gautam Prasad u la shim 2 wiket na ka bynta ka New Warriors.
Haba wan beh ïa ka thong ba la buh da ka liang pyrshah, ka New Warriors Jr ka la ïoh tang 139 run bad shah pynhap 10 wiket ha ki 16.1 over. U Arun Sunar u la tied 36 run na ki 22 bol bad u Pratap Chanda u la ïoh 29 run na ki 24 bol. Katba u Malcom Syiemlieh u la shim 3 wiket bad ïa ki 2 wiket da u Enelbert. Ïa ka nam ‘Player of the Match’ la ïohpdiang da u Settlelight Diengdoh.
Haba phai sha kawei pat ka jingïakhun kaba ar, ka Shibakha ka la jop da 6 wiket ïa ka Sawmer CC. Ka Sawmer ka la shimti ban tied nyngkong ha kaba ka la ïoh 140 run bad shah pynhap 8 wiket ha ki 20 over. U Poilangson Thawmuit u la tied 35 run na ki 36 bol bad u Dakerlang Basaïawmoit u la ïoh 23 run na ki 20 bol. Katba u Sunil u la shim 4 wiket bad ïa ki 2 wiket da u David Isaacson.
Haba wan shimti ïa ka pali kaba ar, ka Shibakha u la ïoh 144 run bad shah pynhap 4 wiket ha ki 14.2 over. U Jason Wahlang u la khyrwit ïa ka shiteng spah kaba 56 run na ki 28 bol bad u Deepak Sahani u la ïoh 31 run na ki 24 bol. Katba u Tony u la shim 2 wiket. Ïa ka nam ‘Player’ of the Match ka ïohpdiang da u Sunil.
