Shillong, K’lyngkot 21
Ka kynhun ki rangïalehkai U-20 ka ri India kan pynkhreh ban ïashim bynta ha ka Mandiri U-20 Challenge Series 2025 (kaba dei ka jingïalehkai kaba don saw tylli ki ri), ha Indonesia naduh ka 24 haduh ka 30 tarik mynta u bnai.
Kine ki kynthup ïa Syria, Jordan bad ka Indonesia, kaba long ka nongpdiang ïa kane ka lympung ïalehkai.
Kaba kham sngewtynnad hangne ka long ba uwei u rangïalehkai ka Jylla, Manbhakupar Malngiang u la paw hapoh kane ka thup jong 23 ngut ki rangïalehkai ka ri.
U Biby Thomas Muttath u la shah thung kum u coach, ha kaba u Mileswamy Govindaraju Ramachandran kum u asst. coach bad u Dipankar Choudhury kum u goalkeeper coach.
Na ka liang u Thomas u la pynbna ïa ki kyrteng jong 23 ngut ki rangïalehkai kiba kynthup ïa ki khynnah kiba dang 17 bad 18 snem (ba la kha ha u snem 2007 bad 2008), kiba dang pynkhreh ïa ka SAFF U19 Championship ka ban long naduh ka 8 haduh ka 18 tarik u Jymmang mynta u snem.
Te kumta ka India kan sdang ïa ka jingïalehkai kaba nyngkong ha katei ka lympung pyrshah ïa ka Syria (24 tarik mynta u bnai), bud sa ka jingïakhun ïa ka Jordan (27 tarik) bad ïa ka Indonesia (30 tarik). Ïa kine ki jingïalehkai yn pynlong ha Gelora Delta Stadium kaba ha Sidoarjo. Baroh kine lai tylli ki kynhun kiba ïakhun pyrshah ïa ka India kin pynkhreh na ka bynta ka AFC U-20 Asian Cup ka ban long ha u Rymphang.
Kane ka kynhun ïalehkai ka ri India kaba dang don ha ka prokram kilanmet ha Goa, ka la mih ha ka Sngi Ba-ar ban leit sha Sidoarjo. Hadien kane ka lympung, kane ka kynhun kan hap ban pynkhreh sa ka SAFF U-19 Championship.
Ki 23 ngut rangïalehkai ka ri India ki long:
Goalkeeper: Suraj Singh Aheibam, Alsabith Sulaiman Thekkekaramel & Karan Makkar.
Defender: Yaipharemba Chingakham, Sumit Sharma Brahmacharimayum, Afinmon Baiju, Mukul Panwar, Malemngamba Singh Thokchom & Jodric Abranches.
Midfielder: Md. Arbash, Mahmad Sami, Levis Zangminlun, Manbhakupar Malngiang, Ahongshang -bam Samson, Ninghthoukhongjam Rishi Singh, Jajo Prashan, Ngamgouhou Mate, Gurnaj Singh Grewal & Danny Meitei Laishram.
Forward: Bharat Lairenjam, Lemmet Tangvah, Sujin S & Mohd. Zulkif.
