Washington, K’lyngkot:
U President ba thymmai jong ka United States, Donald Trump, u la ong ba u President ka Russia, u Vladimir Putin u la pynjot hi da lade ia ka Russia, da ka jingbym treh ban mynjur ia ki jingtyrwa iasuk bad ka Ukraine.
Namarkata, u Trump u la ong ba u Putin u dei ban pyrkhat jngai na ka bynta ka ri bad ka jaitbynriew jong u namar ka rai kaba u shim kyrkieh ka lah ban pynjot bad pynum syndon ia ka Russia. Kumta, haba ai jingkren sha ki nongthoh khubor ha ka sngi ba pynbam smai ia u, u Trump u la ong ba katkum ka jingpeit thuh jong u, u iohi ba ka Russia ka la buh ialade ha ka jingeh kaba khraw.
Hynrei, u Trump u la pyntip ruh ba u dang pynkhreh ban leit kynduh markhmat ia utei u President jong ka Russia bad ban ioh iamir jingmut bha halor ka jinglong-jingman jong ka Russia bad Ukraine ha kine ki sngi.
Kumta ruh u Trump u la ong ba u ngeit skhem ba u Putin un long ba la kloi ban iatrei lang bad ka US na ka bynta ka jingbha jong ka Russia bad kumjuh ka Ukraine ha kine ki sngi ban wan.
Namar u la pynpaw ruh ba ka ioh- ka kot jong ka Russia ha kine ki sngi ka la hiar haduh katta, kynthup ia ka jingkiew dor jong ki mar- ki mata ha kine ki sngi.
Shuh shuh ruh u Trump u la iathuh ba u President ka Ukraine- u Volodymyr Zelensky u la dep kren ha u, ba u kwah ban iasuk noh bad ka Russia bad ban pynkut noh syndon ia ka thma jong ka Russia pyrshah ia ka Ukraine kaba la sdang ha u Rymphang jong u snem 2022 bad kaba dang iai bteng ruh haduh kine ki sngi namar ka jingbym lah jong ka Russia bad ka Ukraine ban iasuk bad ban ia pyndem noh markylliang.
Hynrei, u Trump naduh ka por ba u dang ialap ilekshon naka bynta ka ilekshon President kaba la long ha une u snem ba la dep, u la kular ba un pynkut noh shi syndon ia ka thma jong ka Russia bad Ukraine tang mar ia ioh ban shimti ia ka shuki President jong ka US.
U Donald Trump, ha ka Sngi Nyngkong u la ioh ban bam smai kum u President ba thymmai jong ka United States bad naduh katei ka sngi hi u la shim ia kiba bun ki rai katkum ka jingkular kaba u la khlei ha ki paidbah ha ka por ba u dang pynlong jingialap ilekshon ha u snem ba la leit.
Kumta ruh la ong ba naduh kine ki khyndiat taiew shuwa ba un bam smai, u Trump u la dep maham lypa ia ka Hamas ruh ba lada kam lah ban pynphai noh ia ki briew jong ka Israel hashwa ba un shimti ia ka shuki President, ka Hamas ka la kut lypa bad ka Hamas ruh ha ka Sngi U Blei ka la ioh ban pyllait noh ia ki katto katne ngut ki briew jong ka Israel, ha ka jingiapyllait briew markylliang.
