Jowai, K’lyngkot 22
Ka East Khasi Hills ka la long ka district kaba dang bat ïa ka kyrdan ba hakhlieh duh ha ka sngi ba lai jong ka 6th Meghalaya Games kaba dang bteng ha Jowai bad Wahïajer, East Jaiñtia Hills.
Haduh ka Sngi Balang, ka EKH ka la khur haduh 104 tylli takma (41 ki ksiar, 29 ki rupa & 34 ki rnong). Ia ka kyrdan ba-ar la bat da ka West Jaiñtia Hills kaba la khur 26 tylli ki takma (7 ki ksiar, 8 ki rupa & 11 ki rnong).
Ka Eastern West Khasi Hills ka la wan balai da kaba khur 14 ki takma (5 ki ksiar, 6 ki rupa & 3 ki rnong). Ki kyrdan kiba bud ki long ka Ri Bhoi kaba la khur 23 ki takma (4 ki ksiar, 10 ki rupa & 9 ki rnong).
Ha ka jingïakop mareh 5000m ki shynrang, u Daniel Lyngdoh Wahlang (EKH) u la wan ba nyng-kong hadien ba u la lah ban pyndep 16:03.42 sekhon. U Kresstar June Pathaw (SWKHD) bad u Banjop-lang Wanñiang na WKH ki la bat ïa ka kyrdan ba ar bad balai. Ha ka liang ki kynthei, ka Gloryfy Kurbah (EKHD) ka la khur ïa ka takma ksiar, da kaba pyndep 20:16.21 sekhon, bud sa ka Balasiewdor Pathaw (SWKHD) bad ka Phyrnai Kyndait (EJHD) kiba la khur ïa ka takma rupa bad rnong.
Ha ka High Jump, la sakhi ïa ki jingïalehkai ba itynnad bha ha kaba u Simeon Marak (NGHD) bad u Terang N Sangma (EGHD) baroh ar ngut ki la pyndep 1.83-meter ban ïasam ïa ka kyrdan ba nyngkong. U Primus Ronghi (Ri-Bhoi) u la wan ha ka kyrdan ba lai.
Ha ka High Jump jong ki kynthei, ka Ri-Bhoi lyngba ka Rinalis Ingti bad ka Anrisha Klein ki la ïakhaid na ka bynta ban khur ïa ka takma ksiar. U Jerikchi S Sangma (SGHD) u la khur ïa ka takma rnong da kaba lah kynthih 1.48 meter.
Ka 100mts, u Henry Yoga A Sangma (NGHD) u la khur ïa ka takma ksiar da kaba lah pyndep 11.15 sekhon, katba u Renaldi Dhar ka (WJHD) bad u Hopefulson Lyngdoh (WKH) ki la wan ba-ar bad balai. Ha ka liang ki kynthei, ka Himonki Khaii (WJHD) ka la knieh ïa ka kyrdan ba nyngkong da kaba lah pyndep 13.67 sekhon, bud sa ka Pringchi R Marak (SGHD) bad ka Riyoka Rymbai (EKHD).
Ha ka 800mts, u Eleven Dkhar (EJHD) u la wan ba nyngkong da kaba lah pyndep 2:01.42 second, katba u paralok jong u, u Rishanmeki Ryngkhlem u la khur ïa ka takma rupa bad takma rnong da u Daemiryntihki Pakma (WJHD). Ha ka liang ki kynthei, ka Bethlyne Grace Makri (EKHD) ka la wan ba nyngkong da kaba lah pyndep 2:37.72 sekhon. Ka Monlangki Kyndait (WJHD) ka la wan ba-ar bad balai ka Daplin Wahlang (SWKHD).
Ka sngi kaba saw kan long kaba kham pynshongshit shuh shuh da ka jingïakop mareh 10,000mts, long jump, relay bad ki jingïalehkai kiba bun jait, ki ban long ha Wahïajer Sports Complex, Jowai.
