Washington, K’lyngkot:
Katkum ki khubor, la ong ba ha ka sngi ba nyngkong eh jong u ha ka kam ha ka Sngi Ba-ar, u Secretary of State ba thymmai jong ka US- u Marco Rubio u la pynlong ïa ka jingïalang kaba nyngkong eh jong ki myntri sorkar Quad bad ka Australia, India bad Japan, ha kaba ki la maham pyrshah ban pynkylla ïa ka jinglong jingman ha Indo-Pacific lyngba ki kam pyni bor, da kaba kren siat ia ka China halor ka jingleh donbor jong ka ha katei ka duriaw. Kane ka dei ka jingïakynduh kaba nyngkong eh jong ki heh nongmihkhmat jong ka kynhun kaba pynleit jingmut ha ka China naduh ba u Trump u la wanphai biang sha ka iing White House.
U Rubio u la ïakynduh ïa ki paralok jong u, ka Penny Wong na Australia, u Subrah-manyam Jaishankar na India bad u Takeshi Iwaya na Japan ha Washington.Ha ka jingpynbna ba ïatreilang, ki saw tylli ki ri ki la pynpaw biang ïa ka jingkular ban ïatreilang naka bynta ban pynkhlain ïa ka shong suk- shong shngaiñ ha katei ka bynta jong ka duriaw Indo-Pacific.
Ka China ka la kynthoh bunsien ia ka kynhun Quad, ka kynhun kaba la thmu da u Shinzo Abe, u Myntri Rangbahduh ka Japan, uba la khlad noh bad kaba la pyniar sha ka jingialang jong ki nong-ialam, da u President barim jong ka ri, U Joe Biden, da kaba ong ba ka dei ka jingthmu jong ka US ban pyntikna ia ka jingshngaiñ ha kylleng sawdong ka Asia.
Ka kynhun Quad ka la ïakynduh bunsien ha ka por jong ka jingsynshar jong u President barim u Joe Biden, da kaba pynleit jingmut ha ki kam shipai bad ka ïoh ka kot jong ka Beijing ha Indo-Pacific, khamtam eh ha South China Sea ha kaba ki paralok jong ka US ki la pynkhih pyrshah ïa ki jingdawa jaka jong ka Beijing.
