Kyiv, Nailur:
U President ka Ukraine, u Volodymyr Zelensky, u iathuh ba ma u bad u President jong ka America, U Donald Trump, ki la ïa mynjur ban ïa kynduh ha New York, bad u ong ba ka Ukraine, ka long kaba la khreh ban shim ïa ki sienjam kiba khia, na ka bynta ka jingsuk, ha kaba iatreilang bad ka kynhun jong ka America.
“Ngi la mynjur ban ïakynduh ha New York, bad kane ka jingïakynduh, ka lah ban pynkylla shibun. Ka don ka jingïaid lynti jong ka jingïadei”, la ong u Zelensky, ha ka jingkren jong u hapoh ka rynsan ‘X’, hadien ba u la ïakren bad u Trump.
Watla katta, la ong ba ym pat shym la pynbna ïa ka tarik jong ka jingiakynduh jongki. Ka jingthoh jong u ka la kdew ïa ki bynta kiba dang iakren hynrei kam shym la pynbna ïa ka jingiateh jingsuk ne ïa ka por ban pyntreikam ïa kino kino ki lad ki lynti.
U Zelensky u la pynpaw ïa katei ka jingiakren kum kaba kongsan bad u la ong ba ka la ktah ïa ki bynta kiba kongsan. U la buh ïa ka jingwad ïa ka jingsuk ha pdeng jong ka jingiadei jong ka Ukraine bad ka kynhun jong ka America.
“Ka lynti jong ka jingsuk ka dei ka jingthmu ba nyngkong eh jong ngi,” u la ong.
U President jong ka Ukraine u la ithuh ïa ka jingpynbiang ïa ka bor ding, ka jingpynbiang ïa ka bam bad ka jingiada ïa ka jingim briew kum ki mat kiba dang pyrkhat ryngkat bad ki sienjam kiba lah ban pynduna ïa ki jingeh. Um shym la buh ïa ki jingtyrwa marwei marwei ne batai kumno yn pyntreikam ïa ki.
