Rai ka ïingbishar ban set 5 snem ïa u IAS barim ba klop tyngka

Ka kashari ka la lap ba u Sharma u donkti ha ka kyndon 13 (2) bad kyndon 11 jong ka Prevention of Corruption Act.

Ahmedabad, Kyllalyngkot:

Ka Session Court ha kine ki khyndiat sngi ba la leit ka la rai pynrem ïa u IAS Officer barim u Pradeep Sharma da kaba set patok san snem bad daiñ kuna T.75 hajar halor ka kam bamsap kaba la sdang naduh u snem 2004 ha ka por ba u dang long u Collector jong ka Kutch distrik ha Gujarat.

Ka ïingbishar jong u Principal District bad Session judge u KM Sojitra ka la pynrem ïa u ha ka mukotduma ba la ujor da ka Anti Corruption Bureau (ACB) kaba ïadei bad ka jingai jaka sha ka Welspun Group ha ka dor kaba la kynnoh ba ka la wanrah ïa ka jingduhnong kaba T.1.2 klur tyngka ïa ka sorkar.

Ka kashari ka la lap ba u Sharma u donkti ha ka kyndon 13 (2) bad kyndon 11 jong ka Prevention of Corruption Act.

La rai pynrem ïa u da kaba set patok san snem bad daiñ kuna T.50,000 katkum ka kyndon 13(2), bad la ai ïa u da ka kuna kaba lai snem bad ka kuna kaba T.25,000 katkum ka kyndon 11, ong u nongmudui paidbah u Kalpesh Goswami, da kaba bynrap ba baroh ar tylli ki jingpynshitom kin ïaid lang.

U Sharma, u don mynta ha kawei ka patok ha Bhuj, halor kawei pat ka mukotduma bamsap.

Ka ïingbishar ka la pynlong ïa ka jingbishar lang ïa lai tylli ki mukotduma bamsap kiba ïadei bad ka jingai jaka sha ka Welspun Group, la ong u Goswami.

Katkum ka jingtip ba bniah jong ka mukotduma, u Mr Sharma u la ai jaka ïa ka kompeni ha ka dor kaba long 25 percent na ka dor ba la buh mynta, kaba la wanrah ïa ka jingduhnong ïa ka pla tyngka jong ka sorkar.

Kum ka jingsiew kylliang, la kynnoh ba ka Welspun Group ka la pynlong ïa ka kurim jong u Sharma kum ka paralok kaba 30 percent ha ka Value Packaging, kawei na ki Subsidiary jong ka bad ka la pynjlan ïa ka jingmyntoi kaba T.29.5 lak.

U Sharma u la shahkem ha ka kynhun ACB ha ka 30 tarik Nailur, 2014 halor ka jingkynnoh ba u la pdiang ïa ka bai lutksan kaba T.29 lak na katei ka kompeni shimet ha ka por ba u dang long u nonglum khajna jong ka Kutch ha u snem 2004.

U Sharma, uba mad ïa ki katto katne ki mukotduma bamsap, u la ïakynad bad ka sorkar jylla, ha ka por ba la khlieh da u Narendra Modi.

U la wad ïa ka jingtohkit jong ka kynhun CBI halor ka jingkynnoh ba u la shukor ïa kawei ka kynthei nongshna ïing hadien ba ar tylli ki lad pathai khubor ki la pynmih ïa ki CD jong ki jingïakren ba la kynnoh lyngba ka telephon hapdeng u Myntri kam pohïing jong ka sorkar kmie u Amit Shah, uba dei u Myntri kam pohïing jong ka Gujarat ha katei ka por bad ar ngut ki heh pulit jong ka jylla.

Ki jingïakren, kiba la kynnoh ba ki long hapdeng u Nailar bad Nailur 2009, ki thew ïa uwei u ‘saheb’, uba ki Portas, ki kynnoh ba u dei u Myntri jong ka Gujarat ha katei ka por, ha kaba ha ka jingkwah jong u, la leh da ka jingsnohktilang, ka jingkynnoh, ha kaba la kyntait pyrshah da u Amit Shah.