Jowai, K’lyngkot 23
Ka samla Diva Tang na West Jaiñtia Hills ka la lah ban pynpaw ïa ka sap kaba kyrpang ha ka jingïalehkai Table Tennis jong ka 6th Meghalaya Games 2025 da kaba ïoh ban khur haduh lai tylli ki takma ksiar.
Kane ka ‘thei ïalehkai ka la ïoh jingjop ha ka Mixed Doubles ryngkat u Eraphel Dkhar, kumjuh ha ka Womens’ Double ryngkat ka Medaihunlang Swer bad ha ka jingïakhun marwei kaba la long ha ka 22 tarik mynta u bnai ha Indoor Hall Ladthadlaboh.
Ka jingjop ha kine ki jingïakhun paralok ka long ruh khamtam namar ka jingtbit jong ka Diva kaba la shah jied ruh kum ka ‘Best Women Player’ ha ka Table Tennis. Kane ka jingnoh synñiang borbah ka jong ka, ka la ïarap ruh ban kyntiew ha kaba ïadei bad ka jingïoh khur takma ka West Jaiñtia Hills District ha kane ka lympung kaba dang ïaid mynta.
Nalor kitei lai tylli takma ksiar ba la khur da ka West Jaiñtia Hills ha kane ka jingïalehkai, ka East Khasi Hills ka la bud nadien na ka bynta ban khur ar tylli ki takma ksiar.
Ha ka liang ki shynrang, u Rituraj Shabong na EKH u la ïohpdiang ïa ka nam ‘Best Men Player’ ha kaba u la khur ïa ka takma ksiar ha ka Men’s Singles, kumjuh ha ka Men’s Doubles bad Mixed Doubles.
Ha ka Mixed Doubles, u Rituraj Shabong u la ïakhun ryngkat ka Merryzone Wanñiang bad ïoh khur ïa ka takma rupa na ka bynta ka East Khasi Hills. Kumjuh ha Men’s Doubles, u Shabong bad u Banekhupar Sancley ki la khur ïa ka takma ksiar bad pynlong ruh ba un shah jied kum u nongïalehkai ba tbit tam.
Kiwei pat kiba jop ha ka liang ki shynrang ki kynthup ïa u Chesan Marak na West Garo Hills, uba la ïoh ïa ka takma rupa ha ka Men’s Singles bad u Paban Kanta Kanwar na EKH, uba la ïoh ïa ka takma rnong.
Haba phai sha ka Men’s Doubles, u Gilbert Sohtun bad u Roy Nongbri na EKH ki la khur ïa ka takma rupa, katba u Paban Kanta Kanwar bad u Labeeb Faisal Ahmed na EKH ki la khur ïa ka takma rnong.
