Shillong, K’lyngkot 23
Ka Shillong Lajong FC ka la pynkut noh ïa ka kontrak jong u rangïalehkai shapdeng na Spain u Imanol Arana Sadaba, la pynpaw kane ka klob ha ka social media ha ka Sngi Palei.
Kane ka la wan hadien ar sngi shwa ba ka Lajong kan ïakhun pyrshah ïa ka Namdhari FC ha ka Sngi Saitjaiñ ha Ludhiana, Punjab.
Na ka liang ka Lajong ka la pynpaw ba ïa kane ka rai la shim lyngba ka jingmynjur lang, hynrei ym lah ban tip ïa ka daw tynrai halor kane ka bynta.
Lah ban kdew ba u Imanol u la ïalehkai san sien ïa ka Lajong ha ka I-League 2024-25 bad ka jingïalehkai khatduh ka dei ha ka 19 tarik u Nohprah 2024 pyrshah ïa ka Delhi FC. Na kitei san tylli ki jingïakhun, utei u rangïalehkai na Spain ka la thep shi kol lyngba ka penalty ha kaba ka Lajong ka la jop da 8-0 kol ïa ka Rajasthan United FC ha ka 8 tarik u Nohprah.
Ha shwa ba un wan ïasoh sha ka SLFC ha u Risaw mynshem snem, u Imanol u la ïalehkai na ka Namdhari FC ha ka aïom ïalehkai 2023-24 ha kaba u la ïoh ban mih madan haduh 22 sien ha ka I-League bad u la thep saw kol.
