Ki Khristan Ki Jngai Palat Shispah Mile Na U Blei

Ki Khristan Ki Jngai Palat Shispah Mile Na U Blei

Kane ka long ka jingïohi ïa ka jingim khristan haba ïa nujor bad ka ktien u Blei. Ngi ki khristan bunsien ngim lah ban bud ïa ka jinghikai ka ktien u Blei. Kaba bun eh ka dei ka jingim ba kynja pyrthei. Ngi im tang ka thok ka shukor ka sakhi lamler ka bishni ka pihuiñ bad ka jingsngew pher niam para briew.

Wat kito kiba kam ba ki trei ïa ka kam u Blei hynrei ki dang don ka mynsiem sarong bad sngew ksan ba kham bha ka balang ba ki don katba ka jong kiwei kam long ka balang kaba don jingpynim. Ki nongïalap niam ki ïaroh bad pynksan ïa la ka jong ka balang ne jingngeit ka jong kiwei kam long katkum ka Gospel. Kane ka dei ka rukom im kaba bun ki khristan la ki dei ki khristan ba kynja doh ne ki khristan ba kynja mynsiem ruh.

Dei kane ba sa mih ka kyntien kynthoh kum ki khrisan ka nam, soitan ha ka kam. Namar bun kim ïadei bad ka jinghikai ka ktien u Blei. Kane ka dei ka rukom pateng la pateng ki tymmen basan ba ka Baibl ka ong, kine ki briew ki burom ïa nga da la ki rmiang shyntur hynrei ka dohnud jong ki te ka jngai na nga, hynrei ki mane thala ïa nga haba ki hikai ki jinghikai ïa ki hukum jong ki briew, naba haba ki iehnoh ïa ki hukum u Blei (Markoas 7 : 7-8).

Te u Jisu u la ong, ha u samla uba riewspah, ym don uba bha hynrei tang uwei uba u Blei (Markos 10 : 18). Ki ïingmane ne templ ki lah ban duh noh. Namar u Jisu u la ong, ngan pynjot ïa kane ka templ ba la thaw da ki kti bad ngan tei lai sngi ïa kawei pat ka bym da ki kti (Markos 14 : 58). Te uwei u synran u la ong, Ko Trai shah ba ngan leit noh shwa ban tep ïa la u kpa. Hynrei u Jisu u la ong ha u, ïoh ïa kiba ïap ban tep ïa kiba jong ki, hynrei khie leit noh ma me bad ïalap ïa ka hima u Blei (Loukas 9 : 60).

Ban long nongbud ne synran u Jisu, lada uno-uno ruh u wan na nga bad u bym isih ïa la u kpa bad ïa la ka kmie bad ïa la ka tnga bad ïa la ki khun bad ïa la ki hynmen-hynbew ruh shynrang bad kynthei, hooid bad ïa la jong ka jingim ruh um lah ban long u synran jongnga (Loukas 14 : 26).

Ka hima u Blei ka don hapoh jong phi jong nga (Loukas 17 : 21). Lada uno uno ruh u ieit ïa nga (Blei) un sumar ïa ki ktien jong nga (Ioannis 14 : 23). Namar ka jingim khristan ka dei ban long kiba khuid ha ka dohnud (Baibl).

                                                                C. B. Iawphniaw