Shillong, K’lyngkot 23
Ka Meghalaya ka la ïoh tang 198 run pyrshah ïa ka Odisha ha ka sngi kaba nyngkong jong ka Ranji Trophy 2024-25 Elite Group-A kaba la long ha ka Sngi Palei ha madan Polo.
Ka jingkhyllem uwei hadien uwei nongtied ka Meghalaya ka la wan hadien ka jingïalehkai bha u Tapas Kumar Das uba la shim marwei haduh 6 wiket hadien ba ka Meghalaya ka la shimti shwa ban tied nyngkong.
Haduh ba kut jong ka sngi ba nyngkong, ka Odisha ka la lah ban ïoh 70 run khlem pat hap wat tang kawei ka wiket. Lyngba ka jinglong ka suiñbneng ka la kham plie lad bha ïa ki nongkawang bol, khamtam lei lei ha ka por mynstep, kaba hangne la shem ba ki nongtied ka Meghalaya ki la shah pynkhyllem noh kham kloi.
Pynban ka jingkyrkieh bad shongshit, ka kylla long ka ‘liewlep ïa ki nongtied ka Meghalaya, ha kaba u Bamanbha Shangpliang u la ïoh 14 run na ki 23 bol kaba kynthup ïa lai tylli ki ‘four’. Katba u Nishanta Chakra-borty u la ïoh 27 ron na ki 72 bol kaba kynthup ïa san tylli ki ‘four’, katba ar ngut ki ‘guest professionals player’ u Ajay Duhan bad Anirudh B ki la ïoh 15 bad 12 run.
Hadien kata ka Meghalaya ka la shah pynhap haduh 5 wiket bad ban ïoh tang 75 run ha shwa ba ki nongkawang bol ka Odisha kin bteng ban thom naphang. Pynban ha kum kane ka khim khait, u Sumit Kumar u la ïeng rangbah ban ïalehkai bha da kaba ïoh 40 run na ki 54 bol bad ka 43 ron na ki 61 bol na u Jaskirat Singh Sachdeva.
Hadien kane u Wanlambok Nongkhlaw, uwei na ki samla ïalehkai ba la paw bad ïalehkai ruh ha ka Syed Mushtaq Ali Trophy T20, u la lah ban wanphai biang sha kane ka jingïakhun hadien lai snem, ha kaba u la lah ban ïoh 15 run na ki 29 bol.
Te kumta ka Meghalaya ka la kamai hapoh 200 run ha shwa ba u Swastik Samal bad u Shantanu Mishra ki la lah ïoh 44 run bad 23 run na ka bynta ka Odisha ha ka pali wan tied ba ar.
