Shillong, K’lyngkot 23
Hadien ka jingshah rem ar sien pynbud, ka Laitkor SC ka la wanphai da ka jingjop ha ka Shillong Premier League 2024, hadien ba ka la lah ban pynliem noh ïa ka Nongthymmai SC da 4-0 kol ha ka Sngi Palei ha SSA Stadium kaba ha First Ground, Polo.
Kane ka nam jop ka la wan urlong lyngba u Rikmenlang Nongrum (3), Risuk Malngiang (24) bad u Sandy Kharkongor (37) kiba la thep kol ha ka kylla step bad kawei pat ha ka kylla miet lyngba u Fridison Wanñiang (62).
Ka jingïakhun jong ka wat nyngkong kaba la long ha ka 4 tarik u Naiwieng 2024, ka Nongthymmai ka la jop da 3-1 kol. Te kumta kane ka jingjop mynta ka la pynlong ïa ka Laitkor ban ïoh 13 point bad don ha ka kyrdan hynriew. Katba ka Nongthymmai ka dang sah ha ka kyrdan khyndai ryngkat 7 point.
Ha ka Sngi Thohdieng kin don ar tylli ki jingïalehkai ha kaba ha ka por 11 baje mynstep kan long hapdeng ka Lajong bad ka Sawmer SC, katba ha ka por 2:30 nohphai sngi kan long hapdeng ka Mawlai pyrshah ïa ka Ryntih FC. Ka Lajong bad ka Mawlai ki dei ki kynhun kiba la lah ban ïoh jingjop mar 4-1 kol pyrshah ïa kitei ki kynhun ka liang pyrshah ha ka wat kaba nyngkong.
