Washington, K’lyngkot:
Ha ka jingiaseng duwai ba nyngkong hadien ka jingpynbam smai ia u Donald Trump, kawei ka Bishop ka la kyrpad ia u President ba 47 jong ka US ban don jingisynei ia ki briew kiba shongkha kynthei para kynthei, shongkha shynrang para shynrang bad ‘Transgender’. Kane ka jingkyrpad jong ka Bishop Mariann Edgar Budde ka long ruh kum ka jingkynthoh ïa ki jingpyrkhing ba thymmai jong u Trump ban pynkut noh ïa ka jinglong trai nongshong shnong jong ki phetwir ba la kha- la pun ha US.
Ha ka Sngi Ba-ar, U Trump u la leit jngoh ia ka iingmane bah jong ka Washington National Cathedral, na ka bynta ka jingiaseng duwai kaba nyngkong eh. Hangta, katei ka Bishop ka la kyrpad bad ong “Ha ka kyrteng U Blei jong ngi, nga kyrpad ia phi ba phin isynei ia ki briew ha ka ri jong ngi kiba la dap da ka jingsheptieng ioh kin shah kyntait noh na ka ri kaba ki ju sah baroh shi katta. Kine ki kynthup naduh ki jaitbynriew bapher bapher kum ki ‘gay’, ‘lesbian’ bad ‘transgender’ ha ki longïing ha kylleng jong ka ri”.
Ka Budde ka la iada ruh ia ki nongwan buhai shnong lane ki phetwir kiba trei ia ki kam kiba kongsan ha US ba kim dei ki nong-leh kam sniew. Ka la ong ruh ba ki briew kiba lum ia ki kper jong ngi bad kiba pynkhuid ia ki iing ophis jong ngi, kiba trei ha ki jaka ri syiar bad ki jaka buh doh, kiba sait ia ki pliang hadien ba ngi la bam ha ki jaka bam bad kiba trei miet ha ki hospital – ki lah ban ym dei ki nongshong shnong, lane ki lah ban ym don ia ki kot- ki sla kiba biang hynrei kiba bun ki nongwan buhai shnong kim dei ki nong-leh kam sniew bad kumta ka la kyrpad ia u Trump ba un ym beh ne kyntait noh ia ki na ka ri.
Nalor kane, ka la ong ruh ba kitei ki nongwan buhai shnong ki bym don kot- don sla ki long kum ki nongsiew khajna bad ki para marjan kiba bha.
U Trump, ha ryng-kat ka tnga jong u, ka Melina, bad u Vice President, JD Vance bad Usha Vance, ki la shong ha ka laiñ ba hakhmat eh, katba ka Budde, ka la khot sngewbha ia u President, ba un don ka jingsngewrit bad ban ieng skhem ha ka jingshaniah kaba ki briew ki la ai ha u.
Ynda u Trump u la mih na katei ka iingmane, ki nongthoh khubor ki la kylli ia u la u sngew iahap bad sngew dei ne em ia kaba katei ka nong-ialam niam ka kren ha u, u Trump u la jubab ba ka jingkren jong katei ka nongialam niam kam da long kaba sngewdei ne sngewiahap bad katei ka jingshakri Blei ha katei ka sngi kam da long kaba biang bad namarkata u la kyntu ruh ba ki nong-ialam niam jong ka ri ki dei ban nang pynjanai shuh shuh ia ka rukom shakri Blei bad ka lyngkor jong ki ia ka kam u Blei.
