Shillong, K’lyngkot 24
Ka lympung ïalehkai Third Division Shillong Cricket League 2024-25 ka la nangjam shaphrang ha kaba ka Sanmer bad ka Youngstar ki la ïoh jingjop ha ka Sngi Thohdieng.
Ha kane ka jingïakhun kaba la long ha madan Urkaliar, ka Sanmer ka la pynliem noh ïa ka Shibakha da 108 run. Ka Shibakha kaba la jop ïa ka kynting pisa, ka la ailad shwa ïa ka Sanmer ban tied nyngkong ha kaba ka la ïoh 194 run bad shah pynhap 4 wiket ha ki 20 over. U Donbor Marba-niang u la khyrwit ïa ka shiteng spah kaba 77 run na ki 45 bol bad u Banshan Dkhar u la ïoh 62 run na ki 46 bol. Katba u Samir Sahani u la shim 2 wiket bad shi wiket da u Sunil Yadav na ka bynta ka Shibakha.
Haba wan beh ïa ka thong, ka Shibakha ka la ïoh tang 86 run bad shah pynhap 10 wiket ha ki 13.5 over. U Sunil Yadav u la tied 27 run na ki 20 bol bad u Moon Khar-shing u la ïoh 14 run na ki 18 bol. Katba u Pynsh-ngaiñ Dkhar marwei u la shim 4 wiket bad 3 wiket da u Kiran Thapa. Ïa ka nam Player of the Match la ïohpdiang da u Kiran Thapa.
Haba phai sha kawei pat ka jingïakhun kaba ar, ka Youngstar ka la jop da 10 wiket ïa ka Combine Xl. Ka Combine Xl kaba la kam trai ban tied nyngkong, ka la ïoh 86 run bad shah pynhap 10 wiket ha ki 18.3 over. U Shining Star Chyne u la tied 22 run na ki 38 bol. Katba u Asik Alam u la shim 4 wiket bad 2 wiket da u Rajdeep Barua na ka bynta ka Youngstar.
Haba wan beh ïa ka thong, ka Youngstar ka la lah ban kynjoh sha ka thong da kaba ïoh 88 run ha ki 6.4 over. U Asik Alam u la khyrwit ïa ka shiteng spah kaba 50 run na ki 25 bol bad u Suraj Chettri u la ïoh 24 run na ki 16 bol. Ïa ka nam Man of the Match la ïohpdiang da u Asik Alam.
