Washington, K’lyngkot:
U President jong ka America, u Donald Trump, u la soi ia ka jingbthah ban pynkylla bad pyn-im biang ia ka kyrteng jong u Lum ba jrong tam jong ka North America, sha u Mount McKinley, na u Lum ‘Denali’ ba la buh kyrteng da u President barim jong ka America, U Barack Obama, u ba la leh ia kane ha ka por ba u dang long u President jong ka US ha ki snem ba la leit. Katkum katei ka hukum, ka national park kaba ker sawdong ia utei u lum kan dang bat ia ka kyrteng ‘Denali National Park & Preserve’.
Namar u Trump u la ong ba u la rai ban ai kyrteng biang ia utei u Lum ha ka kyrteng jong u President ba khraw jong ka US- u William McKinley bad kumta ia utei u Lum ruh ym tip biang noh kum u Lum McKinley.
La ong ba dei ka Lisa Murkowski na Alaska, kaba long ka dkhot jong ka seng Republican, kaba la lam khmat ia ka jingpyrshang ban pynlong aiñ ia katei ka jingpynkylla kyrteng ia utei u Lum ha kane ka por.
U William McKinley, u dei u President ba 25 jong ka United States, hynrei la ong ba utei u nongialam um ju leit peit ne jurip ia utei u Lum naduh ki por ka jingsynshar jong u ha kitei ki phew snem ba la leit bad um don ruh kano- kano ka jingiadei bad utei u Lum. Kumta, u President ba hadien jong ka US- u Obama, u la pynkylla kyrteng noh ia utei u Lum ha u snem 2015 sha u Lum ‘Denali’, da kaba shim ruh ia ka kyrteng ba la pyndonkam da ki trai ri- trai muluk jong ka Alaska la bun spah snem.
Utei u Lum u don ia ka jing jrong kumba palat 20,000 phut.
Haba iadei bad kane, u Director jong ka Sierra Club Protection Program, u Athan Manuel, u la pyrshah jur ia katei ka rai jong u Trump ban pynkylla biang ia ka kyrteng jong utei u Lum namar u la ong ba kane ka rai jong u Trump ka long ka jing ibeiñ ia ki nong Koyukon kiba la ju tip ia utei u Lum kum u Lum ‘Denali’ da ki phew snem mynta bad kane ka kyrteng ka don jingiadei bad kitei ki jaitbynriew na katei ka jaka.
