Shillong, K’lyngkot 28
Ka Slog Warriors bad ka Inningstar XI ki la ïoh jingjop ha ka Third Division Shillong Cricket League 2024-25 ha ka Sngi Ba-ar ha madan Urkaliar, Shillong.
Ha ka jingïakhun kaba nyngkong ka Slog War-riors ka la pynliem noh ïa ka Nangkyntiew CC da 7 wiket. Ka Nangkyntiew ka la kam trai ban tied nyngkong ha kaba ka la ïoh 81 run bad shah pynhap 10 wiket ha ki 19.1 over. U Rinaldo Sawian u la tied 38 run na ki 41 bol bad u Cassius Cley Dkhar u la ïoh 17 run na ki 33 bol. Katba u Imroz bad u Subhakar Turha ki la shim mar 3 wiket na ka bynta ka Slog Warriors.
Haba wan shimti ïa ka pali ba ar, ka Slog Warriors ka la lah ban kynjoh sha ka thong da kaba ïoh 82 run bad shah pynhap 3 wiket ha ki 6.5 over. Kane ka la wan lyngba ka jingïalehkai bha u Biawajit Das uba la ïoh ban khyrwit 53 run na ki 18 bol bad u Imroz u la ïoh 10 run na ki 12 bol. Katba u Iaineh Blah u la shim 2 wiket na ka bynta ka Nangkyntiew. Ïa ka nam ‘Player of the Match’ la ïohpdiang da u Imroz.
Haba phai sha kawei pat ka jingïakhun ba ar, ka Inningstar XI ka la jop da 4 wiket ïa ka SCA (A). Ka Inningstars XI kaba la jop kynting pisa ka la ailad shwa ïa ka SCA (A) ba kan tied nyngkong ha kaba la ïoh 150 run bad shah pynhap 10 wiket ha ki 19.3 over. U Sameer Chaudhar u la khyrwit ïa ka spah run kaba 104 na ki 60 bol. Katba u Marshal u la shim 4 wiket bad 3 wiket da u Manmohan Rai na ka bynta ka Inningstars.
Ka Inningstars XI haba wan shimti ïa ka pali ba ar ka la lah ban kynjoh sha ka thong da kaba ïoh 151 run bad shah pynhap 6 wiket ha ki 17.1 over. U Andrew u la tied 50 run na ki 42 bol bad u Deepak Purkhayas-tha u la ïoh 35 run na ki 21 bol. Katba u Abhijit Barua u la shim 3 wiket na ka bynta ka SCA. Ïa ka nam ‘Player of the Match’ la ïohpdiang da u Marshal.
