Shillong, K’lyngkot 28
Ki khynnah ïalehkai ka shlem ai jinghikai jong ka 4FORALL Football Academy, Rangdajied United FC bad ka O M Roy Memorial School ki la long ki lahduh ha ka lympung ïalehkai phutbol ba la pynlong da ka Reliance Foundation Youth Sports na ka bynta ki kynhun hapoh ka jylla Meghalaya.
Ha ka U-15 Girls la rah da ki ‘thei ïalehkai ka 4FORALL Football Academy, ha ka U-19 Girls la rah da ka Rangdajied United FC, katba ha ka U-15 Boys bad U-17 Boys la rah da ki khynnah ka O M Roy Memorial School.
Kane ka lympung ïalehkai jong ka Reliance Foundation Youth Sports ka la thaw lad ïa ki samla ba don sap, da kaba ailad ba kin ïoh ban shim bynta khnang ba ki lah ban pynpaw ïa ki sap ba kyrpang jong ki khynnah shynrang & kynthei ha ki kyrdan rta bapher bapher.
Ïa ka nam Golden Glove ha ka U-15 Girls la khur da ka Dawansaphi Snaitang (4FORALL Football Academy) bad ka nam Golden Boot ka leit sha ka Bonifilia Shullai (4FORALL Football Academy) kaba la thep haduh 27 kol. Ha ka U-15 Boys ïa ka nam Golden Ball la khur da u Ebenezer Sunn bad ka Golden Glove sha u Paulbious Tariang, kiba na ka skul O M Roy. Kumjuh ha ka U-17 Boys, ïa ka nam Golden Ball la khur da u Nangteibanshembha Kharbangar na ka 4FORALL Football Academy.
