Chennai, Kyllalyngkot:
Ka kynhun National Investigation Agency (NIA) ha ka Sngi Ba-ar, ka la pynlong ïa ka jingleit khynra sha 16 tylli ki jaka ha Tamil Nadu ha kaba ïadei bad ka mukotduma pyrshah ïa ki lehnoh ISIS. Ki jingkhynra ka la long naduh ka por step jong ka Sngi Ba-ar hadien ba la ïoh ïa ki jingtip kiba bniah.
Kine ki jingkhynra la pynlong ha ki jaka rieh jong ki briew ba la suba donkti ki long ban lap ïa ki sakhi kiba ïadei bad ki briew kiba donkti ha kaba pynphriang ïa ka jingthmu jong ki lehnoh ISIS bad ban pynrung dkhot hapoh ka kynhun lehnoh, la ïathuh ki tyllong khubor kiba don ka jingtip kaba bniah halor kane ka kam ha ka jingïakren bad ki nongthoh khubor.
Ha ka 21 tarik, Risaw jong u snem ba la dep, ka kynhun NIA ka la kem ïa lai ngut ki briew kiba la shah kynnoh donkti ha ka jingpynbthei bom ha kawei ka kali ba la leh da ki lehnoh ISIS ha ka jingjia ba la jia ha u bnai Risaw, 2022 ha Coimbatore ha Tamil Nadu.
Ka jingtohkit jong ka kynhun NIA ha kane ka jingjia ka la pynpaw ba ki lai ngut kiba la shah kem hadien kata ki la ïatreilang ban pynbiang pisa na ka bynta ban leh ïa katei ka kam pyntriem. Ka mukotduma ba la ujor ha kaba ïadei bad ka jingjia ka la ïarap ban ïohkem bad pynngat ha ki kyndon aiñ ïa ki saw ngut kiba la shah kynnoh da ka NIA ha kane ka mukotduma.
