Shillong, K’lyngkot 29
Ka Malki CC ka la ïoh jingjop ha ka lympung ïalehkai First Division Cricket League 2024-25 ba la pynïaid da ka Shillong Cricket Association. Kane ka la wan urlong lyngba ka jinglah ban pynliem noh ïa ka Golflinks CC da 9 wiket ha ka Sngi Balang ha madan Polo.
Ha kane ka jingïakhun ka Golflink ka la kam trai shwa ban tied nyngkong ha kaba ka la ïoh 95 run bad shah pynhap 10 wiket ha ki 32.5 over. U Mk Ghosh u la tied 16 run na ki 71 bol bad u MD Ajharuddin u la ïoh 16 run na ki 38 bol. Katba u Deibormi Rangad u la shim 3 wiket bad 2 wiket da u Heimon Lyngdoh na ka bynta ka Malki.
Haba wan shimti ïa ka pali ba ar, ka Malki ka la lah ban kynjoh sha ka thong da kaba ïoh 96 run bad shah pynhap 1 wiket ha ki 9.4 over. Kane ka la wan urlong lyngba ka jingïalehkai bha u Junjun M Sangma uba la khyrwit ïa ka shiteng spah kaba 59 run na ki 33 bol bad u Sylvester Mylliempdah uba la ïoh 14 run na ki 22 bol. Katba u Abid Khan u la shim 1 wiket na ka bynta ka Golflinks. Ïa ka nam ‘Player of the Match’ la ïohpdiang da u Deibormi Rngad.
