Shillong, K’lyngkot 29
Ka Meghalaya Motorsports Society ha ryngkat ka jingïatreilang bad ka Motorsports Access ryngkat ka jingkyrshan na ka The Meghalaya Age Ltd, ka la pynbna ba kan sa pynlong ïa ka jingïakob ñiah kali kaba la tip kum ka ‘Speed Fest-Time Attack’ kaba ar sngi lynter ïa kaba la thmu ban sdang ha ka 31 tarik mynta u bnai bad kan kut ha ka 1 tarik u Rymphang.
Haba ai jingkren sha ki lad pathai khubor, na ka liang jong ka Phoebe Dale Nongrum, kawei na ki nongñiah kali rally kynthei ba nyngkong eh na Jylla bad kaba bat kum ka Vice Champion ha ka INRC – Women’s Category 2024, ka la pynpaw ba kane kan long ka sien kaba nyngkong ïa ka Jylla ban ïoh pynlong ïa ka jingïakob ñiah kali (Motorsports) ha ka kyrdan National.
“Kane ka jaka kaba don ka rynsan ha kaba ngi pyrshang ban pynbiang jaka ïa baroh kine ki nongñiah kali, ki nongñiah kali kiba dang thymmai bad kiba dang samla na ka Jylla khnang ba kin ïoh ïa ka lad ban ïakob bad kiwei pat ha ka kyrdan National,” la ong ka Phoebe.
Ka la batai ruh ba ïa kane ka jingïakob ñiah kali yn pynlong ha ki lynti ktieh ha thaiñ Umroi – Umden. Kane ka rynsan ka long ruh shi bynta jong ka Grassroots Project ha ka Motorsports, ka jingthmu ba nyngkong eh ba la thmu da ka Federation of Motor Sports Clubs of India (FMSCI) hapoh ka jingpynïaid jong ka Federation Internationale de l’Automobile (FIA).
Kane ka jingïakob ka thmu ban kyntiew bad pynroi ïa ki sap kiba dang mih bad ban tei ïa ka nongrim kaba skhem na ka bynta ki jingïakob ñiah kali hapoh ka ri.
