Damascus, K’lyngkot:
Katkum ki khubor, la ong ba tang hapoh ar bnai, u Ahmed Al-Sharaa uba long u nong-ialam jong ka kynhun lehnoh na Syria, u la kiew syndon shaduh sha ka kyrdan President ba shipor jong katei ka ri hadien ba ka kynhun Islamist jong u ka la leit ban hiar thma ia ka sorkar bad ka la lah ruh ban pynkhyllem noh ia u Bashar al-Assad.
Kumta, ha ka Sngi Balang la thung ia u Sharaa ban ialam ia ka Syria na ka bynta katto katne por katba kim pat lah ban thung da u nongialam ba pura jong katei ka ri bad la bthah ruh ia u ban thaw noh da ka ïing dorbar thaw aiñ ba shipor hadien ba la pynpra ia ka iing dorbar ha ka por jong u Assad bad la pynsangeh ia ka riti synshar jong u snem 2012.
Kum shi bynta ban iadei ialade bad kane ka kyrdan kaba u bat, utei u President ba shipor u la pynthymmai bad pynwan dur bha ialade naduh ka riam ka beit bad nadong-shadong hi bad u la phong ia ka suit bad u tie ban pdiang sngewbha ia ki riew pawkhmat nabar ri naduh ba u la weng noh ia u Assad na ka jingsynshar ha ka 8tarik u Nohprah.
U Sharaa u la ioh ruh ban pynlong ia ki jingïakren ba ïaid beit- ïaid ryntih bad ki nongthoh khubor ba nabar ri, da kaba pyni ïa lade kum u riew-ieid ri uba kwah ban tei pat bad ban pynkhie-im biang bad ban pynia-tylli biang ïa ka Syria, kaba la shah pynjot bad shah pynpra hadien saw snem ba la sakhi ia ka thma pohïing.
Ki bor synshar thymmai jong ka Syria, ki la pynbna ruh ha ka Sngi Balang halor ka jingpynduh noh ïa ki kynhun kieng atiar, ba kynthup ïa ka Hayat Tahrir al-Sham (HTS) jong u Sharaa hi, kaba long ka tynrai jong ka kynhun lehnoh Al-Qaeda ha Syria.
Naduh ba la pynkut noh ïa ka jingïadei bad ka Al-Qaeda ha u snem 2016, u Sharaa u la pyrshang ban pyni ïalade kum u nongïalam uba kham jemnud, bad ka HTS ka la pynduna ïa ki jingkren beiñ jongka, da kaba kular ban ïada ïa ki jaitbynriew rit paid kiba shong ha Syria.
Hynrei u Sharaa um pat lah ban pdiang ia ka jingkynnoh jong ki katto- katne ki nongpeit bniah bad ki Sorkar jong ki ri Sepngi kiba dang ñiew ia ka HTS kum ka seng lehnoh.
