Dhaka, Risaw:
Ka Myntri Rangbahduh barim jong ka Bangladesh, ka Sheikh Hasina, ka la pynpaw biang ïa ka jingthmu jongka, ban wanphai biang sha la ka jong ka ri, ha u bnai December, wat lada ka sorkar ba mynta, kaba la ïalam da U Tarique Rahman, kan “kem, pyniap ne pynshitom bein” ïa ka. Ka Hasina, kaba la phet krad na Bangladesh hadien ka jingkhyllem jong ka sorkar jong ka ha u Nailar jong u snem 2024, ka la ong ba ka jingwanphai jong ka, ka lah ban pynlong ïa ka ban shah set phatok ne shah thombor hynrei ka la kynthoh ba ka jingkitkhlieh sain pyrthei ka dawa ïa ka ban ieng ryngkat bad ki nongkyrshan jong ka.
Haba kren ha ka jingïalang bad ki nongthoh khubor ha America, katei ka Myntri Rangbahduh barim ka la ong ba ka dei ka jingkitkhlieh jong ka ban leit phai biang sha Bangladesh bad ba ki jingma kiba don sawdong jong ka kin ym pynsangeh ïa ka.
“Ngan leit phai biang sha Bangladesh ha u bnai Nohprah. Khlem jingsheptieng. Nga tip ba ki lah ban pyniap ïa nga, ban kem ïa nga bad ban pynshitom bein ïa nga…Ka dei ka jingkitkhlieh jong nga ban leit,” ka la ong, khlem da iathuh ïa ka tarik kaba tikna ba kan wanphai.
“Katno ka long kaba ma, ngam sngewthuh. Nga hap ban leit phai biang,” la bynrap biang ka Hasina.
U khun jong ka, u Sajeeb Wazed Joy, hadien kata, u la ïathuh ha ki nongthoh khubor ba ym shym la buh tarik bad yn sa pynbna kham jan bad ka por.
