Nairobi, Risaw:
Utei u nongialap ba la shu kam hi ïalade hapoh Kenya, ryngkat bad ki paralok jong u, ha ka sngi Nyngkong ki la shah pynngat kyndon halor ka jingpyniap ïa ki 190 ngut ki khynnah bad uwei u rangbah ha ka kynhun mane blei kaba pawnam bha jong ka jingkyrduh bam.
Namar la iathuh ba da ki spah tylli ki met iap la lap naduh u snem 2023 ha ka jaka mane blei kaba don shapoh ri na ka jaka jngohkai pyrthei ha rud duriaw jong ka Kenya ha Malindi, ha kaba la tip kum ka “Ka jingpyniap briew ba shyrkhei ha ka khlaw Shakahola”.
La iathuh ba utei u briew uba la kam ïalade kum u Pastor Paul Mackenzie, u la ialam bakla bad bthah ïa ki nongbud jong u, ba kin shah thngan haduh ba kin da dkut mynsiem, khnang ba kin ioh ban iakynduh bad U Jisu.
Kumta, hadien ba la rah ïa u hakhmat ka ïingbishar, la ong ba u la shu sngap mynthi hapoh ka kamra bishar kaba plie ha Mombasa hadien ba la sakhi ba ma u bad 28 ngut kiwei pat ki ïa donkti ha katei ka jingialam bakla bad kaba la long pynban ka kam pyniap briew kaba shyrkhei.
Nga sngewhun ba ka liang pynshitom ka la pynshisha ïa ka mukotduma pyrshah ïa baroh ki 29 ngut kiba shah kynnoh halor ka jingpyniap ïa ki 190 ngut ki khynnah bad uwei u rangbah,” la ong ka nongbishar, ka Diana Kavedza Mochache.
Ka Ophis jong u nongpyniaid jong ki nongmudui paidbah ka la pdiang sngewbha ïa ka rai kaba “kyrpang”, ha kaba u nongpyniaid u Renson u la iathuh ha ki nongthoh khubor: “Ka jingioh ïa ka jingpynrem ïa kum kine ki jingshah kynnoh…kam dei kaei kaei kaba wan da kaba suk.”
Ha ki lai snem naduh ba la lap ïa katei ka met iap, la lap shuh shuh ïa ki met iap jong ki khynnah, ki kynthei bad ki shynrang, kaba la kyntiew ïa ka jingdon jong baroh ki metiap ba la lap, sha ka 400 tylli tam.
U Mackenzie, u la kyntait ruh ïa ki jingshah kynnoh ba u la pyniap briew khlem ka mynsiem iatip lem, da kaba ialam bakla ïa kitei ki nongbud bad ki riewngeit kiba la shaniah ha ka jingialam jong u.
