Vijayawada, Kyllalyngkot:
Kum ka jingkynnoh ba ka jingpynïaid jong ka YSRCP kaba mynshuwa ka la wanrah ïa ka jingpynjot kaba palat ïa ka jingmutdur, u Myntri Rangbah ka jylla N Chandrababu Naidu u la ong ba ka jingkheiñ jong u haba u don ha ka liang pyrshah ba ka jylla ka la kylla long kawei pat ka Sri Lanka ka la urlong da ka AP Fiscal Health Index (FHI) 2025 kaba la pynmih da ka NIveTI Aay ba ka jingpynneh ïa ka ram jong ka jylla ka la poi sha ka Zero ha u snem 2022-23.
U Naidu u la ong ba wat la ka sorkar jong u ka long kaba shisha ban pyndep ïa ki jingkular ha ka por thep vote kum ka Thalliki Vandanam, ka Annadata Sukhibhava bad kiwei, hynrei ka shim por namar ka jinglong jingman kaba sniew ha ka liang ka pisa tyngka jong ka jylla.
Ha ka jingpyni Power Point ha State Secretariat ha kine ki khyndiat sngi ba laleit, u Naidu u la ong ba ka FHI ka pynpaw ïa ki jingeh kiba kongsan ha kaba pynïaid ïa ka pisa jong ka jylla.
Ha u snem jong ka mang tyngka 2022-23, ka jingpynlut pisa ka la poi sha ka kyrdan kaba duna bha, kaba la kot tang 3.5% na ka jingpynlut baroh.
Shuh shuh, ka jingpynlut ba la kular, kynthup ïa ka tulop, ka penshon, bad ka jingsiew ïa ka sut, ka la bam kumba 51% na ka jingpynlut ha ka khajna, kaba la pynduna shibun ïa ka jinglah ban bei tyngka ha ka roi ka par.
Nalor kata, ka jingkiew jong ka khajna jong ka jylla ka la hiar bha, da kaba hiar na ka 17.1% ha u snem 2018-19 sha tang 9.8% ha u snem 2022-23, katba ka ram paidbah ka la kiew ha ka dor kaba 16.5% shisnem.
Ka jingpynneh ïa ka ram jong ka jylla ka la hiar sha ka zero ha u snem mang tyngka 2022-23, la batai u Myntri Rangbah ka jylla.
U Naidu u la ban jur ïa ka jingdonkam jong ka jingpynïaid ïa ka pla tyngka ban ïakhun ïa ki jingeh kiba mih na ka jingkitkhlieh jong ka jylla ha ka ram.
“Ki don ki ram kiba kot sha ka 9.75 lak klur tyngka, bad ki kontraktor mynta ki shim ïa ka lad jong ka aiñ ban ïoh ïa ki ram kiba dang sahteng. Lada ka jylla ka duh noh ïa ka jingshaniah, kan sa mad ïa ki jingeh kiba kham khraw shuh shuh ban ïoh ram ha ki por ban wan,” u la maham.
Haba kynthoh jur ïa ka sorkar barim namar ka jingpyndonkam bakla ïa ka pisa kaba jur bha, u la ong, “Ka kaiphod jong ka NITI Aayog ka dei ka jingpynshisha ïa ka jingpynjot ïa ka pisa kaba la wanrah da ka YSRCP.
Ha kine ki san snem ba la leit noh, ka jingsynshar kaba sniew ka la pynlong ïa ki jingtei kiba sniew, ha kaba ki surok ki la kylla long ki thliew, bad ka jingshim ram palat ka la pynlong ïa ka Jylla ban shah ktah ha ka liang ka pisa tyngka.”
Wat hapdeng kine ki jingeh, u Naidu u la pynpaw ïa ka jingshaniah ha ka jinglah jong ka sorkar ban pynphai biang ïa ka jinglong jingman ha ka liang ka pisa tyngka.
“Ngin buh biang ïa ka jylla ha ka lynti kaba dei. Ki briew ki la shaniah ha ngi, bad ngin burom ïa kata ka jingshaniah”, u la smai.
U Myntri Rangbah ka jylla u la pynpaw ïa ki jingbei tyngka kiba dang ïaid shakhmat kiba kular ban pynmih ïa ki lad kamai kiba kongsan.
“Ki Kompani kum ka Green Energy, ArcelorMittal, NHPC, BPCL, ha ryngkat ka Reliance, LG bad kiwei kiwei ki bei pisa ha ka jylla. Kine ki jingbei tyngka kin thaw ïa ki lad ïohkam-ïohjam na ka bynta ki 4.1 lak ngut ki samla jong ngi”, u la ong.
