Imphal, K’lyngkot:
Ka Janata Dal (United), Manipur Unit ka la rai ban weng noh ïa ka jingkyrshan na ka Sorkar hapoh ka jingïalam ka BJP ha ka Jylla.
Ka seng kaba don uwei u dkhot ka la rai ban weng noh ïa ka jingkyrshan katkum ka shithi kaba la thoh da u khlieh nongïalam ka seng ha ka Jylla, u K. Biren Singh sha u Lat ha ka Sngi Balang.
U Singh u la ong ba ki don 6 ngut ki kyrtong ka JD (U) kiba la shah jied sha ka Ïingdorbar Thawaiñ ba 12 jong ka Manipur, hynrei 5 ngut na ki, ki la phet noh sha ka BJP. Kane ka jingphet seng jong kitei ki MLA ka dang don mynta ha ka jingbishar hakhmat ka Tribunal u Lamphang katkum ka Khyrnit ba 10 jong ka Riti Synshar ka ri.
Une u khlieh nongïalam ka JD (U) u la ong ba u MLA ba marwei, u Adbul Nasir u shong ha ka liang pyrshah hapoh ka Ïingdorbar Thawaiñ ka Jylla.
Hynrei ïa kane ka rai jong ka State-Unit la kyntait noh da ka JD (U) ha ka kyrdan jong ka ri.
U National Spokesperson ka JD (U), Rajiv Ranjan Prasad, u la kyntait ïa katei ka khubor – ba ka long kaba “ïalam bakla bad ka bym don nongrim”.
Shuh shuh u la ong ba ‘u Kshetrimayum Biren Singh, u President ka JD(U) Unit u la thoh ïa ka shithi khlem da kynjoh ktien ïa ki nongïalam ba halor jong ka seng.
U President ka Manipur Unit u la shah weng noh na ka kam, u la ong.
Kumba ka long, ka BJP ka don 37 ngut ki MLA bad la kyrshan ïa ka da 5 ngut ki MLA ka NPF bad 3 ngut ki MLA khlem seng ha ka Ïingdorbar kaba 60 ngut ki dkhot.
