Washington, Rymphang:
Hadien katto katne sngi jong ka jingjia tyngkhuh hapdeng ka liengsuiñ kit nongleit nongwan bad ka liengsuiñ shipai hapoh ka nongbah Washington DC jong ka United States, ha kaba 67 ngut kiba shong hapoh ki la khlad noh baroh. Kumta ka kaiphod kaba thymmai ka la pynpaw ba ki tnat pynïaid liengsuiñ jong ka US ki dang jynjar ban tehlakam namar ka jingduna nongtrei.
La ong ba palat 90% na 313 tylli ki jaka pynïaid liengsuiñ jong ka ri America ki treikam hapoh ki kyrdan nongtrei ba la ai jingmut da ka tnat pynïaid liengsuiñ jong ka Sorkar Pdeng (FAA).
Tad haduh jong u bnai Kyllalyngkot, ki don haduh 285 tylli ki jaka, kynthup ïa ki tower pynïaid kali bad kiwei kiwei ki jaka, ki don hapoh ka jingpeit jong ki nongtrei ba la buh da ka FAA bad ka seng jong ki nongpynïaid. Ka jingdon ki nongtrei ha ki 73 tylli na kine ki jaka ka long kaba duna haduh katta ba ym duna ia ka shi bynta na ka saw bynta ka rukom ba ju dei ban don ki nongtrei.
Kane ka kam ka la paw shai hadien ba la peit bniah naduh ba ka liengsuiñ jong ka American Airlines bad ka liengsuiñ jong ka Black Hawk Army, ki la ïatyngkhuh hajan Reagan National Airport ha kine ki khyndiat sngi ba la leit. Ha ka por ba jia katei ka jingjia, tang uwei u nongtrei ba peit ia ka leit ka wan jong ki liengsuin, u dang pyniaid ia ki helicopter bad katto katne ki liengsuin na ka Reagan National Airport tower, ka kam kaba ju donkam kumba 2 ngut ki nongpeit.
Wat la ki ju tip ba ka leit- ka wan da ki liengsuiñ ka US ka long kaba shngaiñ tam ha ka pyrthei, hynrei ka jingduna jong ki dkhot nongtrei bad ka jingbym pynlut pisa ha ki lad ïada ka la wanrah ia kum kine ki jingjia jan man ka por.
Ka jingduna ki nongtrei ka jur bha ha ka thaiñ New York, ha kaba ar tylli ki jaka treikam kiba kongsan ha Long Island ki treikam bad kumba 40% na ki kam kim pat pyndap. Kine ki jaka ki pynïaid ïa ka leit ka wan ki liengsuiñ na ka bynta ki katto katne ki kad liengsuiñ kiba bun briew bha ha US kiba kynthup ïa ka Newark, JFK bad LaGuardia, kiba la pynïaid ïa ki 1.2 million ki liengsuiñ ha u snem ba la dep, katkum ka jingtip na ki bor pynïaid liengsuiñ jong ka New York bad New Jersey.
