Philadelphia, Rymphang:
Katkum ki khubor, la iathuh ba ka liengsuiñ rit jong ki riew shimet ka la leit hap bakla ha ki bynta jong ka thaiñ Shatei Lam Mihngi jong ka Philadelphia ha ka Sngi Thohdieng, ha kaba ki lad pathai khubor ki la pyllait ia ki dur jong ka iing paki kaba la pluh bad julor na ka jingleit hap jong katei ka liengsuiñ rit.
Kane ka liengsuiñ kaba ka Federal Aviation Administration ka la ong ba ka dei ka liengsuiñ Learjet 55 executive kaba long ban shong tang ar ngut ki briew, ka la leit hap noh ha katei ka District kaba bun briew jong ka nongbah Philadelphia kaba don bun ki ïing, ki dukan bad ki surok kiba heh.
Katei ka liengsuiñ rit ka dei kaba dang thmu ban leit hiar sha ka Kad Liengsuiñ jong ka Springfield-Branson National Airport ha Missouri bad ka mih na ka Kad Liengsuiñ jong ka Northeast Philadelphia.
Ha kajuh ka por, u Sean Duffy, Myntri ka kit ka bah jong ka US, u la ong ba la ioh jingtip ba ki don hynriew ngut ki briew hapoh jong katei ka liengsuiñ.
Wat la katta, ym shym la ioh jingtip ban don kiba mynsaw ne khlad ha katei ka jingjia bad kumta utei Myntri u la pan jingïarap na kiba shong ha katei ka jaka ba katei ka liengsuiñ ka leit hap bad kumjuh ia ki nongsakhi jong katei ka jingjia ba kin phah jingtip sha ki bor pyniaid bad ka tnat ba dei khmih khnang ba kin ioh ban leh ia kaba donkam baroh.
Katei ka jinghap jong ka liengsuin ha ka nongbah jong ka US, kaba don ha ka rud duriaw Mihngi, ka la jia tang hadien ar sngi ba ka liengsuiñ kit nongleit nongwan bad ka liengsuiñ shipai jong ka US ki la ïa tyngkhuh ha ka Kad Liengsuiñ jong ka Reagan National Airport ha ka nongbah Washington, ha kaba 67 ngut ki briew ki la duh noh ia ka jingim ha ka katei ka jingjia kaba sniewbok bad kaba shyrkhei katta katta.
