New Delhi, Rymphang:
Ka Supreme Court, ha ka Lah Sngi U Blei, ka la buh jingkylli ïa ka sorkar kmie, halor ka jingthmu jong ka, ban set ïa ki spah ngut ki nongwan buhai shnong beaiñ na Bangladesh, ha ki jaka set byndi ha India, ha ki por bym lah buh por, ha ka jaka ban pynphai noh ïa ki sha la ka jong ka ri trai ri.
“Ngi kwah ban sngewthuh na ka sorkar kmie bad West Bengal ba shisien ba u nongwan buhai shnong be-aiñ na Bangladesh u la shah rai pynrem na ka bynta ka kam runar ba la kynnoh, hato ym shym la pynshisha ba um dei u nongshong shnong ka ri India?
Kaei ka jingmut ban buh ïa ki spah ngut kum kine ki nongwan buhai shnong beaiñ ha ki jaka set briew haduh ka por bym lah buh por? Ka sorkar kmie ka donkam ban jubab ïa kane ka jingkylli,” ong ka kynhun nongbishar kaba don arngut ki nongbishar ba kynthup ïa u Justice JB Pardiwala bad u Justice R Mahadevan.
Kane ka jingpeit bniah ka la wan ha ka por ba dang bishar ïa kawei ka mukotduma naduh u snem 2013. Ha ka jingïaid jong ka jingbishar, ka ïingbishar ba ha khliehduh ka la pynshai ba lada u nongwan buhai shnong na Bangladesh u la shah kem bad shah rai pynrem katkum ka Foreigners Act, 1946, dei ban pynphai noh mardor sha la ka jong ka ri hadien ki jingshah pynshitom.
Ka kynhun nongbishar ha ka hukum ka la kdew ba ki don haduh 850 ngut ki nongwan buhai shnong beaiñ kiba la shah set ha ki ïing pynshitom bad ka la wad ban tip ïa ki jingkheiñ kiba thikna. “Katno ngut ki nongwan rung be-aiñ kumba long mynta ki don ha ki jaka set ne Jake ban pynbeit ïa ki hadien ba la rai pynrem bad ki la mad ïa ka jingshah pynshitom baroh kawei katkum ka aiñ bar jylla?” ka kynhun nongbishar ka la kylli ïa ka sorkar kmie.
