Raphael Warjri
Ka lah ban long ba ha kata ka juk ba ki mrad ki ïa lum lang ha kawei ka jaka kaba lah ban shem kaei kaei kaba ki donkam kyllum lang ban poi lang shirup khlem da syier ne tieng iwei ïa iwei. Hynjrei la kumno kumno ka khanatang shaphang jong ka ïew Luri Lura ka phalang pat ïa ka jinglong jingman ha ka khaiï jong ki briew ha kane ka juk. Kine ki long kiei kiei kiba jylliew ka jingmut ba dei ban phnieng la ka janor khnang ba lah ban kham peiphang shuh shuh shaphang ka jingstad ki longshwa manshwa. Wat lada ha kawei ka liang la kdew ba ym don bynta eiei kita ki mrad bad ka khaiï pateng, ha ba ki shu leit dih ummluh na ka wah. Kumta ka lah ban long ba ki matti rikynti ba ïathuh khanatang shaphang ka Ïew Luri Lura ha ka shnong Mawlyngbna bad shnong Sakwang ka lah ban dei ba mynnor ka don ka wah ka ba tuid bad kyrsoi ummluh umshngiam ba ki mrad ki lmun bha ban leit dih. Hynrei ha ka khanatang ka dei ka ba la pynwandur kum ka ïew khaiï, ha ba la nam ïa kawei pa kawei ka jynthaw ba ki don la ki basa ban die mar. Katkum ka khanatang la batai ba ki skei ki sier ki don la ka basa jaiñ, ha kaba ka ksew ba la sin ka Dom ka wan phrung hapdeng ba lait jaka ki skei ki sier na ka bynta ban leit tyrwa die tungtoh tungrymbai. Kane ka khana ka phalang pat ïa ka pharshi kaba long ka jingshisha ïa ka jingthaw ka mariang haduh mynta mynne.
Haba ong ba ki ksew ki don ka sap ban smadien ïa baroh ki jynthaw na kano kano ka lynti ba ki dei ïaid lyngba, ki lap thik thik na ka syrwet ba ki smadien ba kiwei kiwei ki jait mrad pat kim lah. Kane ka dei kaba long salonsar ha satlak ka pyrthei, ba wat ki riewtbit ka juk mynta ha kaba leit swar dienjat ïa ki briew kum ki pulit ïa ki riew bymman, ki ju pyndonkam da ki ksew. Kane ka dei kaba la seng khana ha ki paidbynriew Khasi naduh kulong kumah, ba ha ka Ksaw ka Kpong dei ban don beit u sewbeh kum u ba syntiat bad swar dienjat ïa ki mrad ba thmu ban leit beh kpong. Ki dang don byllasi ki jingstad jong ki longshwa manshwa shaphang ki kynja ksew ba ym da sngew donkam ban batai bniah ha kane ka phang. Tang khyndiat khynsoit lah ban jer shaphang ki suri ki myrsiang kiba dang ïadei parajait bad ki ksew ba ki don kum kajuh ka sap, hynrei kim lah ban tbit kat ki ksew. Sa kaei pat ka bynta ba ki kynja ksew ba ïeng shkor ki dei kiba tiengpud, bad marmlien ban wiar kulmar, katba ki ksew demshkor pat ki dei ki ba jemnud bad ym ju wiar kulmar, hynrei ki ba shlur bad runar. Kine ki dei tang katto katne na ki jingstad jong ki longshwa manshwa Khasi ba kham ñiar ban shem ha kiwei kiwei ki jaitbynriew, hynrei ki don ka snap pat ka ba long salonsar. Ha kum kine kiei kiei, ki briew ha kiwei kiwei ki bynta jong ka pyrthei ki lah tang ban shu tip ïa ka jinglong ba shisha, hynrei ym lah ban batai ïa ka daw. Hynrei ki longshwa manshwa Khasi pat ki da don da ka khanatang puriskam kaba batai bniah ban lap ïa ka jingshisha shaphang ka jingstad katkum ki ñia ba la buh, kaba ym don mano mano ruh ha pyrthei ba lah ban len.
Da ka khanatang Khasi ba ki mrad baroh ki ïuhroit ïa ka ksew, ka Dom ba sa nang baroh ki pateng ksew ban smadien ïa baroh ki mrad, ka mih ka jingshisha ha ka pyrthei ba kiwei kiwei ki jaitbynriew kim pat lah ban peiphang, hynrei ka jinstad ki longshwa manshwa Khasi ka la don lypa naduh mynnor. Kumta ki khanatang bad puriskam ym dei ki khana ba dei ban shim ba ki dei kiba shisha bad ym dei hi ruh ban ñiew ba ym dei kaba shisha namar ki don ïa ka pharshi ka ba phalang ïa ka jingshisha ha ka pyrthei. Kumba ïa ka Ïew luri lura, ym lah ban ñiew ba dei kaba shisha, hynrei ka parom khanatang puriskam jong ka mynnor ka phalang ïa ka jingshisha ha ka juk mynta. Kumjuh ruh kumba ïa ka ksaw ka kpong ba ka ksew ka die tungtoh tungrymbai ym lah ban ñiew ba dei kaba shisha, hynrei ka parom jong ka khanatang puriskam ka phalang ïa ka jingshisha ba shem ha pyrthei haduh mynta mynne.
Kumno ka parom Ïew Luri Lura kum ka khanatang puriskam ka phalang ïa ka jingshisha lah ban batai da kaba buddien artat ïa ka khana. Ha ka khana la shem ba ka skei ka sier ki hylla kyrkait ban thied ïa ki jaiñ jong ki kiba tat dor hynrei ki pynbieit ïa ki paidbah ba wan ïew ban pynthaba da ki rong ki rup jong ki jaiñ- kata ka ïa syriem thik kum ki dkhar die pusari ha ïew ki ba marmlien ban tyrwa die da ki mar tat dor kiba thaba bha ka rong ka rup. Katba ka ksew ka die tungtoh tungrymbai kaba bang ba shngiam da baroh hynrei ka shah ñiewbeiñ haduh ba ki kynnoh ba ka ïewtung bad ki sa ïuh kyrdem ïa ka shang buh tungtoh tungrymbai- kata ruh ka syriem ïa kito ki nongdie kiba die ïa ka mar ba kynsai hynrei kiba ym ju pyrta briew bad ki lah ruh ban shah ïuhroit ha kito kiba die da ka mar tat dor. Kum kita kiei kiei ki long kiba jia bad ïai jia ha ka khaiï pateng ba kiba thok ki kamai da ka thok ka shukor bad kiba shida ki kamai da ka hok ka sot.
